Agrikultura, naturalesa & kalidat di kuminda

Salubridat di bestia i asuntunan veterinario

Pa promové salubridat di hende i bestia LNV a yuda e Entidatnan Públiko Boneiru i Sint Eustatius ku mehorashon di nan matansianan. Den deliberashon ku Boneiru a traha na un mehorashon mas aleu di e matansia. Tambe ta investigá si den e área di kombatimentu di malesa di bestia i e atmishon di remedi pa bestia tin posibilidat di mehorashon.

Agrikultura, hortikultura i kria di bestia

Pa redusí e dependensia di importashon por tuma medida pa oumentá e produkshon di agrikultura na e islanan. E ministerio di LNV huntu ku e Entidatnan Públiko i e institutonan di konosementu hulandes ta wak posibilidatnan pa realisá un produkshon mas grandi i mas duradero.

Pa esaki na Saba for di e Pago Ekstraordinario Naturalesa a finansiá un proyekto pa trata ku kabritu ku ta kana lòs i un proyekto pa oumentá i stimulá e produkshon lokal di kuminda. Na Sint Eustatius tambe ta finansiá un proyekto pa trata ku bestia ku ta kana lòs. Na Boneiru tin un proyekto ta kore pa Agrikultura Duradero i Desaroyo di Kunuku ku a sali for di e Plan di Desaroyo di Kunuku (POP, Plattelandsontwikkelingsplan) (mira e dokumentu abou na e página aki). Ademas pa medio di un MoU a palabrá ku Boneiru pa kambia e servisio LVV na e isla den un sentro di konosementu i informashon efektivo.

Asuntunan fitosanitario

Pa motibu di e kantidat abou di produkshon lokal di kuminda na e islanan di Hulanda Karibense, ta importá kasi tur kos. Esaki ta konta tambe pa importashon di mata i produktonan vegetal. Pero espesialmente e importashon di bèrdura i fruta pa kome i mata pa e sektor hardinero ta trese e riesgo di importashon di espesie invasivo eksótiko. Tin un kuadro legal pa maneho i regla fitosanitario den e Lei di Importashon BES.

Protekshon di mata

Mal uso di medida pa protehá mata por tin peliger pa salubridat di hende i bestia. E riesgo di mal uso lástimamente ta grandi na e momento aki. Pasobra no tin un evaluashon formal ta tuma lugá di e riesgonan di e medidanan aki. E konosementu di e riesgonan, sigur serka e usadónan, tambe ta limitá. Ademas e etikètnan i e instrukshon pa uso hopi bia ta skibí na un idioma deskonosí i asina no por sigui e instrukshonnan.

Despues lo aktualisá e lista di material ku mester di pèrmit i material prohibí. E ora ei lo ta kla kua produktonan por usa solamente ku pèrmit i kua produktonan ta prohibí kompletamente pa usa.