Naturalesa

E islanan di Hulanda Karibense tin un rikesa grandi di diversidat biológiko. Nan tin mas ku shen espesie ku ta úniko pa un di e islanan i ku no ta eksistí niun otro kaminda na mundu (espesie endémiko). Ademas nan ta ofresé un refugio pa desena di espesie di bestia òf mata ku mundialmente ta bou di menasa i un diversidat di ekosistema mundialmente menasá.

E awanan i áreanan kostero ku ta rondoná e islanan tin un rikesa di mondi di mangel, yerba di laman i ref di koral. E naturalesa riku aki ta ofresé nos awa limpi, kuminda, protekshon di kosta i remedi. Tres kuart di e turistanan ku ta bini e islanan ta bini pa e naturalesa aki. Pero e naturalesa na e islanan ta vulnerabel, tantu pa motibu di e superfisie chikí i komo konsekuensha  populashonnan chikí, komo pa e pèrdida -, fragmentashon - i degradashon di hábitat. Ademas pa henter e region karibense espesienan invasivo strañero i e efektonan di kambio di klima ta forma un menasa.

Caribbean-natuur.jpg

E awanan rònt di e islanan ta kontené un biodiversidat marino riku. Den e Zona Ekonómiko Eksklusivo (EEZ) serka di Saba i Sint Eustatius tin Sababank, un atòl di koral bou di awa ku ta un di esnan mas grandi di mundu. Riba e atòl aki ketu bai ta keda deskubrí espesie nobo di piská, lima i espesie di koral moli ku nunka promé no a deskribí sientífikamente. E laman hundu i e refnan di koral hundu rònt di e islanan te awor apénas a eksplorá, pero ta manera tin un rikesa di espesie ei tambe.

P’esei gobièrnu hulandes ta tuma akshon riba vários tereno. Ta tene kuenta ku e obligashonnan segun diferente tratado internashonal riba e tereno di protekshon di naturalesa i peskeria.