Boneiru ta anfitrion pa enkuentro internashonal tokante protekshon di tribon
Di 20-24 di novèmber2017 un grupo di ekspertonan internashonal di tribon ta hospedá na Captain Don's Habitat na Boneiru pa diskutí medidanan pa protekshon di tribon internashonalmente.
Paisnan, ku ta varia di Filipina te Arabia Saudita, di Merka te Oustralia i di Costa Rica te Chile a manda ekspertonan Boneiru pa un enkuentro di e komishon asesor di e ‘Memorandum of Understanding’ tokante konservashon di tribonnan migratorio (MOU di tribonnan), den kuadro di e Tratado tokante Espesienan Migratorio (CMS).
E reunion akí ta trese tantu e komishon asesor komo e grupo di trabou pa konservashon di e MOU di tribonnan huntu, pa diskutí kua espesienan di tribon i manta mester di mas protekshon internashonal, kon por protehá nan mas mihó, kon den esaki por kooperá bon ku organisashonnan di peska i kon por krea kapasidat pa mihó protekshon di tribon. Nan lo formulá huntu rekomendashonnan pa e Enkuentro di Firmantenan (Meeting of Signatories) di e MOU di tribonnan, ku lo finalmente lo tuma desishonnan.
Hulanda ta un di e 41 firmantenan di e MOU di tribonnan; ministerio di Agrikultura, Naturalesa i Kalidat di alimento (LNV) ta organisá e tayer akí na Boneiru pa yuda e isla profilá komo un isla ku ta tene kuenta ku tribon i un "destinashon bèrdè" i tambe pa duna mas publisidat na e MUO di tribon den e área karibense, kaminda ainda masha poko pais a firma e MOU. Boneiru ya for di 2008 ta protehá tribon pa motibu di nan importansia pa turismo di buseo i a afiliá su mes den 2015 tambe na e Reservado Yayari pa mamíferonan marino i tribonnan, ku ta inkluí e awanan di Boneiru i Saba. Tourism Corporation Bonaire (TCB) ta sostené e enkuentro i ta yama e partisipantenan bonbiní djaluna anochi ku un bríndis i snèk.
E MOU di tribon ta e promé instrumento mundial pa konservashon di espesienan di tribonnan migratorio. Tribonnan ta bou di menasá serio mundialmente. Segun un estimashon, na e momentunan akí un kuart di tur espesie di tribon i manta ta mundialmente menasá. E kantidat di tribon ku ta mata anualmente ta varia entre 63 mion pa 273 mion bestia.
E MOU di tribon ta un instrumento internashonal hurídiko no-obligatorio den kuadro di e Tratado tokante Espesienan Migratorio (CMS). Su empeño ta pa logra i konservá un estado faborabel di konservashon pa espesienan di tribonnan migratorio a base di e mihó informashon sientífiko disponibel i teniendo kuenta ku e balornan sosial-ekonómiko di e espesienan akí pa e hendenan den diferente pais. Na e momentunan akí tin 29 espesie di tribon menasá inkorporá den anekso I di e MOU.
Hulanda ta hunga un papel aktivo den e ‘Sharks MoU’. Ku Hulanda Karibense aserka e awanan di Hulanda ta un área residensial òf migratorio pa kantidat di espesie di tribonnan migratorio. Partikularmente pa Hulanda Karibense tribonnan ta forma un atrakshon importante pa turismo di buseo i turismo di buseo ta e pilar ekonómiko di Boneiru; p’esei e isla a disidí kasi dies aña pasa kaba pa protehá tur tribon. Mas resien tantu Boneiru komo Saba a pidi Hulanda pa instituí un reservado pa tantu tribon- komo mamíferonan marino den e awanan di e islanan i e den e awanan pegá ku e Zona Ekonómiko Ekslusivo. A base di esaki a instituí den 2015 e Reservado Yarari, ku lo yuda mehorá protekshon di tribonnan, partikularmente di tribonnan migratorio.