Plan di maneho pa Naturalesa i Medio ambiente Hulanda Karibense
E plan di maneho pa Naturalesa i Medio ambiente Hulanda Karibense 2020-2030 (NMBP) ta trata e tópikonan komun i esnan spesífiko pa kada isla, loke ta hasi e NMBP un plan integral pa tera i awa den e parti Karibense di Hulanda.
E ministerionan di Infrastruktura i Maneho di Awa (I&W), Ministerio di Asuntunan Interno i Relashon den Reino (BZK) i Agrikultura, Naturalesa i Kalidat di kuminda (LNV) a konsipiá e plan konhuntamente. Banda di esaki a realisá e plan ku hopi embolbimentu di e islanan i ta tene kuenta ku e deseonan lokal i sirkunstansianan.
Meta di e plan ta pa konservá, protehá i hasi uso na un manera duradero di e naturalesa riku di Hulanda Karibense. Un naturalesa salú ta kontribuí na e desaroyo ekonómiko di e islanan. Un bon maneho teritorial den e kaso aki ta esensial. E NMBP ta e punto di partida pa elaborashon di agèndanan di implementashon pa kada isla i ta brinda e strategia i e kuadro ku kada isla, huntu ku e Reino, por kuminsa traha na dje e dékada aki.
Menasanan
E estado di naturalesa di Hulanda Karibense ta moderá te no faborabel. E menasanan mas importante pa e naturalesa ta e bestianan ku ta kana lòs, espesienan invasivo, kambio di klima, piskamentu eksesivo, eroshon i ‘eutrofiëring’ (ekseso na fertilisashon) dor di awa residual. E kalidat no faborabel di e abitatnan ta pone ku esaki no ta resistente sufisiente pa por karga ku e efektonan di kambio di klima di awor i esnan di den futuro. E aserkamentu integral den e NMBP tin komo meta pa huntu ku e ministerionan envolví i e Entidatnan Públiko redusí algun faktor di preshon manera redusí òf kita e komedónan di yerba ku ta kana lòs i e kontaminashon di awa, pa asina rekobrá i fortalesé e resistensia di e naturalesa.
