Curvin George nombrá komo gezaghèber interino di Boneiru
Entrante promé di febrüari, 2018 Curvin George ta keda nombrá komo gezaghèber interino di Entidat Públiko Boneiru pa un periodo di un aña. Gilbert Isabella, Representante di Reino di Boneiru, Sint Eustatius i Saba, a tuma e desishon aki riba 27 novèmber 2017.
Curvin George tin eksperensia amplio riba tereno gubernamental i den sektor públiko den e parti Karibense di Hulanda. Komo direktor di Voogdijraad Hulanda Karibense sr. George a kontribuí na desaroyo riba tereno di kuido hubenil i desaroyo di e organisashon. Entrante promé di yanüari 2018 sr. George a keda nombrá komo direktor di Kuido pa Hóben i Bienestar di Famia Hulanda Karibense (Jeugdzorg en Gezinsvoogdij Caribisch Nederland). E lo ehersé e funshon di gezaghèber interino banda di su trabou diario.
E gezaghèber interino lo bai dirigí su mes prinsipalmente riba e prosesonan di tomo di desishon regular i kontinuidat den Kolegio Ehekutivo i Konseho Insular na momentu di ousensia di gezaghèber.
Nombramentu di un gezaghèber interino ta responsabilidat i outoridat di Representante di Reino a base di artíkulo 91 di WolBES. Despues ku e gezaghèber interno aktual a indiká ku e no ke bini na remarke pa renombre den e funshon aki, Representante di Reino a inisiá e proseso pa yega na un nombramentu nobo. Pa logra esaki a papia entre otro ku miembronan di presidium di Konseho Insular.
Tin palabrashonnan kla trahá entre gezaghèber, gezaghèber interino i Representante di Reino tokante e momentunan ku e gezaghèber interino lo aktua. Esaki lo ta den kaso ku gezaghèber no ta na Boneiru òf na momentu ku tin un situashon ku e no por kumpli ku su funshon.