A alkansá punto mas haltu di ekspanshon di Liseo

A alkansá e punto mas haltu di e proyekto di konstrukshon “Ekspanshon Liseo Boneriano” ku ta keda den e bario boneriano Hato. Ehekushon di e proyekto di konstrukshon ta kana segun planifikashon.

Hoogste punt uitbreiding Liseo bereikt
Riba e foto e representantenan di e diferente partidonan embolbí: Diputado Edsel Cecilia, sra.. Maritsa Silberie (na nòmber di OCW), sr. Etienne van der Horst Direktor di R&O, sr. Frans van Efferink na nòmber di Komunidat di Skol Boneiru, Ronald Haakfes na nòmber di VOF Haafkes Boneiru, miembronan di e tim di proyekto i alumnonan di SGB.

Diputado Edsel Cecilia ta presidente di e grupo piloto di e proyekto di konstrukshon akí. Sr. Edsel Cecilia ta duna di konosé:

“Komo presidente di e grupo piloto di e trayekto di konstrukshon akí pa mi ta un  plaser pa mira e avansenan kana segun planifikashon. Enseñansa ta haltu den mi apresio, kaminda enseñansa ta esun ku ta pone e fundeshi pa un mucha sigui desaroyá. Mi ta spera ku realisashon di e proyekto aki, ku alumno-, mayor- i dosentenan ta kontentu ku un ambiente eskolar nobo i seif. Ku e lo por sirbi komo estímulo pa e alumnonan sigui desaroyá mas. Aki mi kier gradisí OCW i otro partnernan pa e kooperashon agradabel i konstruktivo den kua pa medio di input konhunto, nos a alkansá e resultado deseá. “Together we move mountains”. Señor Reynolds (Nolly) Oleana, hefe di Enseñansa, Kultura i Siensia na RCN ta añadí na esaki: “E proyekto di konstrukshon akí ta hasi posibel ku tur e klasnan eskolar di MAVO, HAVO i VWO di SGB ta na un solo sitio. Di e forma akí skol por duna lès mas efisiente i sigui mehorá kalidat di enseñansa i siguridat sosial”.

Por mira un impreshon tridimenshonal di e diseño riba e wèpsait di e arkitekto, bou di proyektonan. Segun planifikashon na komienso di e aña eskolar 2018/2019 e lo tumá e partinan nobo di e edifisio den servisio. E sekshonnan MBO, VMBO i SLP di Scholen Gemeenschap Bonaire ta keda alohá na Kaya Korona.

Realisashon di e proyekto di konstrukshon akí ta parti di e plan di alohamentu pa enseñansa pa Boneiru, ku konhuntamente ta finansiá pa entidat públiko Boneiru i ministerio di Enseñansa, Kultura i Siensia (OCW). Na nòmber di entidat públiko Boneiru i OCW, Rijksvastgoedbedrijf ta koordiná ehekushon di e diferente proyektonan ku ta forma parti di e plan aki. Ekspanshon di Liseo Boneriano ta ser realisá pa e kontratista VOF Haafkes na Boneiru. E tim di proyekto ta konsistí di Hein van Senten, Milena Ramirez–Silberie i Richard Weenink komo representante di SGB, Rudaliah Mercelina i Timoteo Silberie komo representante di Entidat Públiko Boneiru, Paul Wichers komo ‘directievoerder’ na nòmber di Jacobs Architekten i Wouter Tuenter komo representante di RCN/OCW i Rijksvastgoedbedrijf.

Proyektonan di alohamentu pa enseñansa ku a realisá anteriormente na Boneiru ta renobashon di Kolegio San Bernardo den 2014, konstrukshon nobo di Skol Strea Briante (ántes Watapana) den 2016, konstrukshon nobo di Skol Amplio Papa Cornes den 2016, renobashon di Kolegio Rayo di Solo (ántes Kolegio Reina Beatrix) den 2017, renobashon di Kolegio San Luis Bertran den 2017 i e salanan di gemnastik di SGB na Kaya Korona den 2017.