Sekretario di Estado Knops ta bishitá Sint Maarten, Sint Eustatius i Saba
Sekretario di Estado Knops (di Asuntonan Interno i Relashonnan di Reino) lo bishitá tur tres e islanan ariba, di djaluna 27 di novèmber te ku djadumingu 3 di desèmber.
E bishita ta repartí den dos pida. Di 27 pa 30 di novèmber e sekretario di estado tin su mes programa. Djis despues di esaki e lo akompañá Su Mahestat Rei i Su Mahestat Reina, Máxima, ku di 30 di novèmber te ku 2 di desèmber lo bishitá Sint Maarten, Sint Eustatius i Saba.
Durante di e programa di su promé bishita aki, sekretario di estado Knops lo sera konosí mas aleu ku e mandatarionan di e islanan i e lo papia ku representantenan di industria i komersio i NGO’s tokante di e rekonstrukshon nesesario despues di orkan Irma. Tambe e lo bishitá diferente organisashon riba e islanan.
E sekretario di estado ta mira en adelante di su promé bishita na e parti Karibense di Reino Hulandes, despues di su nombramentu: “Mi ke mira ku mi mes wowo kon e situashon di Sint Maarten, Sint Eustatius i Saba ta awor. Despues di e orkannan pisá ku a afektá e islanan, a kuminsá mesora ku suministrashon di ayudo di emergensia. Ademas e gabinete resientemente a pone 550 mion euro disponibel pa Sint Maarten i 67 mion euro disponibel pa Saba i Sint Eustatius pa e rekonstrukshon nesesario. Awor nos mester kuminsá rápidamente ku esei.”
E programa di sekretario di estado Knops ta inisiá djaluna 27 di novèmber na Sint Maarten. E lo bishitá Saba kuminsando e atardi di 28 di novèmber. I pa finalisá e lo bishitá Sint Eustatius kaminda e lo yega den e atardi di 29 di novèmber.
For di djárason 30 di novèmber sekretario di estado Knops lo akompañá Su Mahestat Rei i Su Mahestat Reina durante di nan bishita na Sint Eustatius i Saba.