CBS: Gobièrnu e dunadó di trabou di mas importante den Hulanda Karibense
Gobièrnu ta e sektor di mas grandi den Hulanda Karibense: mas o ménos 1,9 mil persona, ekivalente na 15 porshento di tur trahadó riba e islanan. Esaki ta resultá for di investigashon di CBS. Den 2016 10,7 mil hende di 15 te 75 aña tabatin un trabou pagá na Boneiru, na Sint Eustatius eseinan tabata 1,6 mil i na Saba kasi 1 mil.
![Voorkant CBS kantoor](/binaries/medium/content/gallery/rijksdienstcn-papiamentu/banner-afbeeldingen/cbs/cbsss.jpg)
Na Saba e sektor di gobièrnu ta proporshonalmente esun di mas grandi (27 porshento). Riba e isla akí hopi hende ta traha tambe den enseñansa. Motibu di esaki ta prinsipalmente pasobra aki tin un universidat médiko merikano establesé. Na Boneiru mas hende ta gana nan pan den horeca ku den gobièrnu (14 i 13 porshento). Ademas e isla akí konosé un sektor di konstrukshon relativamente amplio (11 porshento). Na Sint Eustatius nan ta traha mas frekuente den industria (17 porshento). Esaki tin di aber ku presensia di e kompania merikano NuStar ku tin un terminal di almasenahe. Den gobièrnu i industria ta traha prinsipalmente den servisio salarial, miéntras ku den horeca i konstrukshon tin relativamente hopi trahadó riba nan mes aktivo (respektivamente 21 i 18 porshento).
Mayoria di trahadónan no a nase riba e isla
Di e trahadónan ménos di 4 di kada 10 a nase riba e isla unda nan ta biba. Na Boneiru 20 porshento a nase riba un otro isla di (anterior) Antianan Hulandes, manera Kòrsou, Aruba i Sint Maarten, 14 porshento na Hulanda Oropeo i 29 porshento otro kaminda. Na Sint Eustatius i Saba respektivamente 43 i 46 porshento di e hendenan ku un trabou a nase otro parti. Orígen di e trahadónan di otro parti ta hopi distinto. Habitantenan di Repúblika Dominikano ta forma e grupo di mas grandi. Banda di esaki na Boneiru ta trata relativamente hopi bia di hendenan di Colombia, Venezuela i Perú.
Mitar di trahadónan na gobièrnu ta isleñonan nasé
Entre e sektornan komersial tin diferensia den kua gruponan di poblashon ta traha ei den. Den gobièrnu kasi mitar di e trahadónan ta un isleño nasé. Na Saba esaki ta te asta 58 porshento. Ademas partikularmente na Boneiru den gobièrnu tin proporshonalmente hopi trahadó prosedente di un di e otro islanan di (anterior) Antianan Hulandes òf – den un grado menor– di Hulanda Oropeo. Na Sint Eustatius i Saba kasi 1 di kada 5 persona a nase otro parti.
Den enseñansa tin pa loke ta trata orígen di personal diferensianan grandi entre e islanan. Na Boneiru 43 porshento di e forsa laboral den e sektor ei ta un isleño nasé, 27 porshento ta prosedente di Hulanda Oropeo i 21 porshento a nase riba un di e otro islanan di (anterior) Antianan Hulandes. Na Sint Eustatius mayoria di e trahadónan ta prosedente di un otro isla di (anterior) Antianan Hulandes. Na Saba 65 porshento ta prosedente di otro parti.
Trahadónan den horeca i konstrukshon hopi bes ta di otro parti
Den horeca i konstrukshon tin relativamente poko isleño nasé ta traha riba e islanan: respektivamente 23 i 25 porshento. E sektornan empresarial akí ta ser dominá pa forsanan laboral ku ta bin di otro parti. Nan ta bin partikularmente di paisnan di Sentro- i Suramérika, manera Repúblika Dominikano, Colombia i Venezuela. Eksepshon riba esei ta e sektor di horeca na Boneiru, unda tin relativamente hopi otro isleño- i hulandesnan oropeo ta traha.
Fuentenan
StatLine - Caribisch Nederland; werkzame beroepsbevolking, bedrijf SBI 2008
StatLine - Caribisch Nederland; arbeidsdeelname, geboorteland
Lenk relevante
Artíkulo - Zeven op de tien Caribische Nederlanders aan het werk