Ofisina di Seguro di Kuido (ZVK) ta hiba pashèntnan di Sint. Maarten kas bèk
Manera ta konosí, un grupo grandi di pashèntnan di Sint Maarten a keda evakuá pa Aruba, Boneiru i Kòrsou despues di pasashi di orkan Irma, Ta trata aki di entre otro pashèntnan di diálisis di nir i pashèntnan ku tabata den nesesidat urgente di kuido hospitalario.
Afortunadamente e hospital di Sint Maarten, St. Maarten Medical Center (SMMC) ta operashonal atrobe. Inspekshon di Salubridat di e isla, despues di un inspekshon, a konsiderá estado di e hospital komo igual manera e tabata promé ku pasashi di e dos orkannan. Esei ta nifiká ku e pashèntnan aki por regresá nan isla.
ZVK ta konsiente ku banda di aspektonan médiko, otro aspektonan sosial tabatin hopi influensia manera heimwé a hunga un ròl grandi pa loke estado mental di e pashèntnan aki. Ta p’esei ZVK ta hasi tur loke ta na su alkanse pa hiba e grupo di pashènt aki, di un forma responsabel i lihé, bèk pa nan isla.
Den e kuadro aki a kuminsá djadumingu dia 22 i djaluna dia 23 di òktober ku buelonan di regreso for di Aruba pa Sint Maarten. Un grupo grandi, den kua un total di 48 pashènt di diálisis di nir, a biaha ku dos buelo pa Sint Maarten, kompañá pa personal di enfermeria. Un grupo di 13 pashènt ku for di despues di orkan Irma tabata interná den hospitalnan na Kòrsou i Boneiru, lo biaha djaweps dia 26 di òktober pa Sint Maarten. ZVK, den e dianan ku ta sigui, lo sigui sòru pa regreso efisiente i responsabel di pashèntnan di Sint Maarten bou di su kuido.