Sosten den preparashon pa orkan Irma den parti Karibense di Reino
Orkan Irma ta pasa di djamars anochi te ku djárason mèrdia, ora Hulandes, riba e islanan Sint Eustatius, Saba i Sint Maarten. Den e konteksto di Reino e ministerionan konserní ta hasiendo preparashonnan nesesario pa sostené e islanan, minimalisá daño i enfrentá posibel konsekuensianan.
Kasi 100 militar Hulandes a sali for di Kòrsou i Aruba rumbo pa Sint Maarten, Sint Eustatius i Saba. Ademas dos barku di Marina lo sali for di Kòrsou i Aruba pa entregá èkstra militar i suministro ouksiliar despues di e pasada di Irma. Hulanda a ofresé asistensia i sosten, tambe pa remediá kualkier daño despues di pasada di e orkan.
Un tim di impakto di tempu ku representantenan di e ministerionan di Infrastruktura i Medioambiente (I&M), Seguridat i Hustisia (V&J), Asuntunan Ekonómiko (EZ), Defensa i Ministerio di Asuntonan Interno i Relashon di Reino (BZK) konhuntamente ku representantenan riba e islanan ta kolaborá pa por atendé kualkier otro preguntanan di emergensia rápidamente. Minister Plasterk di BZK a papia ekstensivamente i ta mantené kontakto ku minister presidente Marlin di Sint Maarten i via e Representante di Reino ku outoridatnan na Sint Eustatius i Saba.
Segun KNMI e kódigo kòrá ta na vigor. Na e momentunan aki Irma ta un orkan di kategoria 5.
Den pasado a hasi invershon kaba pa hasi e islanan mas firme pa un posibel orkan, i asina minimalisá e daño mas tantu ku ta posibel. Asina a instalá hopi liñanan eléktriko bou di tera i a mehorá plannan di desaster.