Protekshon adishonal pa ‘Sawshark’ i ‘Silky shark’
Siman pasá e paisnan karibense a palabrá pa añadí dos espesie mas na e aneksonan di e Protokòl pa área- i espesienan spesialmente protehá (e asina yamá SPAW Protocol – Specially Protected Areas and Wildlife), e úniko instrumento hurídiko transnashonal pa medioambiente den e área karibense.
Riba insistensia di Reino Hulandes paisnan afiliá den e region a disidí unánimemente pa rekomendá pa bin ku protekshon pa ‘largetooth sawfish’ i ‘silky shark’ bou di e reglanan (obligatorio) di SPAW.
"Nos ta hopi kontentu ku nos proposishonnan por a konta ku tantu sosten asina", Paul Hoetjes, koordinadó di maneho di naturalesa Hulanda Karibense di e ministerio hulandes di Agrikultura, Naturalesa i Kalidat di Kuminda (LNV) ta bisa. "Dor di partisipá na e protokòl di SPAW e paisnan ku ta forma parti a tuma e obligashon riba nan pa garantisá protekshon di e animalnan úniko akí."
Estudio
No mas ku siman pasá a sali un estudio den kua ta klasifiká e ‘Largetooth Sawfish’ (Pristis pristis) komo espesie ku ta pertenesé na e elasmobranchen- ku mas ta ser menasá ku ekstinshon. Aktividatnan humano manera sobrepeska i destrukshon di áreanan di biba (habitatnan) krusial manera ref di koral i mondi di pal’i mangel a okashoná e deterioro akí. Pa loke ta trata e ‘Silky Shark’ nan kantidat a baha konsiderabel pa motibu di sobrepeska rònt mundu i awor nan mester di protekshon pa evitá mas deterioro.
Nederlandse Elasmobranchen Vereniging (NEV) a traha hopi estrecho ku ministerio di LNV, a duna input sientífiko pa e proposishonnan i a pèrkurá pa esakinan ta den konkordansia ku otro normanan internashonal.
Irene Kingma, direktor di NEV: "Na 2015 nos a kuminsá traha huntu ku Reino Hulandes riba protekshon di tribon i chucho bou di SPAW. Nos ta hopi kontentu ku e kolaborashon akí a haña kontinuashon pa loke ta trata formulashon di e proposishonnan pa e espesienan ikóniko akí."
Importante
"Nos ta enkantá di mira ku e dos espesienan hopi importante akí awor por haña protekshon legal den Laman Karibe i nos ta spera di mira mas espesie añadí riba e aneksonan di SPAW, di manera ku e área karibense por bira un refugio mundial pa tribon i chucho", di akuerdo ku Tadzio Bervoets, lider di ‘Save Our Sharks Project’ di Dutch Caribbean Nature Alliance ku ta ser supsidiá pa Postcode Loterij Aprobashon di e proposishon ta un promé paso importante den direkshon di inkorporashon permanente den e protokòl.
Na mart lo tuma desishon definitivo durante e konferensia di SPAW di esnan ku ta forma parti, despues di kua e protekshon lo drenta na vigor.