Seshon di informashon Schadefonds Geweldsmisdrijven

Riba djaweps 13 di desèmber un grupo diverso di profeshonal di entre otro organisashonnan di ayudo, kuido di salú, abogasia, polis i Ministerio Públiko, a asistí na un seshon informativo di Schadefonds ku ta planiá pa lansa na Boneiru, Sint Eustatius i Saba.

Schadefonds Bijeenkomst Professionals

Schadefonds Geweldsmisdrijven ta un órgano di gobernashon independiente ku ta kai bou di Ministerio di Hustisia i Seguridat. E organisashon aki ta proveé pago di un solo biá na víktima ku a sufri leshon físiko i/òf síkiko grave di un krímen violento . Famia di promé grado di víktima di krímen violento òf delitu di morto pa kulpa tambe por hasi aplikashon pa pago na Schadefonds.

Na e momentu aki e organisashon ta aktivo na Hulanda so. Pero Minister di Protekshon Legal a entregá un proposishon di lei na Tweede Kamer tokante ekspanshon di tareanan di Schadefonds na Hulanda Karibense. Asina esaki ta akordá dor di Parlamento na Den Haag, Schadefonds por kuminsá trata petishonnan for di Hulanda Karibense tambe.

Komo ku víktima i/òf nan famia di promé grado lo mester hasi petishon via di e Ofisina di Ayudo pa Víktima (Bureau Slachtofferhulp (BSH)), empleadonan di BSH di tur e tres islanan a haña treinen dos mitar dia tokante di Schadefonds. E delegashon di Den Haag a bai di bishita tambe serka diferente ’stakeholder’, por ehèmpel serka gezaghèber, Ministerio Públiko (OM), Kuerpo Polisial Hulanda Karibense (KPCN), wes, voogdijraad, servisionan médiko i RCN.

Pa mas informashon tokante Schadefonds por tira un bista riba www.schadefonds.nl. Pronto lo lansa un wèpsait ku informashon ku enfoke spesialmente riba Hulanda Karibense.