ACM ta publiká tarifa máksimo pa elektrisidat i awa di bebe 2019 pa Boneiru
Autoriteit Consument en Markt (ACM) ta stipulá e tarifanan máksimo nobo pa elektrisidat i awa di bebe na Boneiru entrante promé di yanüari 2019. Ta trata di e tarifa di uzo fiho i e tarifa di uzo variabel ku Water- en Energiebedrijf Bonaire (WEB) tin mag di kobra e konsumidó maksimal for di promé di yanüari 2019 pa kubri e gastunan di produkshon i suministro di elektrisidat i awa di bebe. Tambe ACM ta stipulá e tarifa pa konekshon i rekonekshon pa 2019.
Basá riba e Lei elektrisidat i awa di bebe BES (Wet elektriciteit en drinkwater BES), ACM tin e tarea pa stipulá tarifa ku ta kubri e gastunan kada aña. Esei ta nifiká ku ACM a kalkulá kiko ta kosta WEB pa produsí elektrisidat i awa di bebe i suministrá esakinan na e konsumidó. ACM ta publiká e desishonnan di tarifa pa elektrisidat i awa di bebe riba e wèpsait di ACM.
Kambio den tarifanan
Na Bonaire e tarifa di uzo variabel pa elektrisidat ta baha di USD 0,287 pa USD 0,269 pa kWh. E tarifa máksimo pa pagabon ta baha di 0,5003 pa 0.4765 pa kWh.
E kousa prinsipal di e bahada di e tarifa di uzo variabel ta ku den 2019 ta bin un solushon struktural pa e kapasidat di produkshon. Esei ta ku ContourGlobal ta bai amplia e kapasidat di produkshon. E espektativa ta ku WEB pa e motibu ei for di sèptèmber 2019 no tin mester di hasi uzo mas di e Aggrekonan ku ainda ta instalá na Hato.
E gastunan pa e tarifa di uzo fiho pa elektrisidat ta baha. Pa konsumidónan ku kapasidat di konekshon mas abou e gastunan aki ta sali alrededor di USD 1 pa luna mas barata.
Pa awa di bebe e tarifa di uzo variabel ta subi na Boneiru di USD 3,76 pa USD 4,44 pa meter kúbiko di awa di bebe. E subida akí ta okashoná pa e ekspanshon di produkshon di awa di bebe ku ta tene kuenta kuné den 2019. WEB ta ferwagt ku ta bai hasi mas gastu pa e ekspanshon akí. Ta inkorporá e gastunan ei den e tarifa.
E gastunan di awa di bebe ku trùk ta hiba ta keda mas òf ménos igual i ta kosta USD 17,92 pa meter kúbiko di awa di bebe (esaki tabata USD 17,29 sin konta supsidio).
E gastunan pa e tarifa di uzo fiho pa awa di bebe a keda mas òf ménos igual: 45,02 USD pa luna pa konekshon standart (esaki tabata USD 45,87 sin konta e supsidio).
ACM a baha e tarifanan pa konekshon (tarifa pa un konekshon nobo) pa konekshon standart: di USD 2.351 pa USD 1.571 pa elektrisidat i di USD 1.633 pa USD 1.070 pa awa di bebe. Riba enkargo di ACM, WEB a investigá kiko e gastunan eksakto tabata ku WEB ta hasi pa realisá konekshonnan nobo. For di e investigashon ei a resultá ku e gastunan akí ta mas abou ku loke ACM na promé instante a basa e tarifanan di konekshon ariba. P’esei ACM ta baha e tarifanan akí entrante promé di yanüari 2019.
E tarifa pa rekonekshon a keda igual na USD 40,-.
Pa tene kuenta ku elektrisidat i awa di bebe mester keda pagabel, partikularmente kas di famia chikitu, ministerio di Ekonomia i Klima i ministerio di Infrastruktura i Maneho di Awa a palabra ku lo baha e tarifa figo pa elektrisidat i pa awa di bebe pa medio di supsidio. Manera e repartishon di supsidio ta konosí, WEB lo informá su klientenan tokante e tarifanan ku lo bai kobra entrante promé di yanüari.