ACM ta publiká tarifanan máksimo pa elektrisidat i awa di bebe 2019 pa Saba
Autoriteit Consument en Markt (ACM) ta stipulá e tarifa máksimo nobo pa elektrisidat i awa di bebe na Saba entrante promé di yanüari 2019. Ta trata di e tarifa di uzo fiho i e tarifa di uzo variabel ku Saba Electric Company (SEC) tin mag di kobra e konsumidó maksimalmente for di promé di yanüari 2019 pa kubri e gastunan di produkshon i suministro di elektrisidat. Tambe ACM ta stipulá e tarifa pa konekshon i rekonekshon pa 2019.
Basá riba e Lei di elektrisidat i awa di bebe BES (Wet elektriciteit en drinkwater BES), ACM tin e tarea pa stipulá kada aña tarifa ku ta kubri e gastunan. Esei ta nifiká ku ACM a kalkulá kiko ta kosta SEC pa produsí elektrisidat i suministrá esaki na e konsumidó. ACM ta publiká e desishonnan di tarifa riba e wèpsait di ACM.
Kambionan den tarifanan
Na Saba e tarifa di uzo variabel pa elektrisidat ta baha di 0,3735 USD/kWh pa 0,3516 USD/kWh. E bahada akí ta bin pa motibu ku a tuma solar park 1 den servisio i e espektativa ta ku lo tuma solar park 2 tambe den servisio den 2019. Apesar di e subida di preisnan di kombustibel tòg e gastunan pa kilowatt pa ora ta baha. Sin e produkshon ku energia solar e tarifa pa uzo variabel lo tabata 0,4319 USD/kWh entrante promé di yanüari 2019.
E gastunan pa e tarifa di uzo fiho pa elektrisidat ta keda mas òf ménos igual.
A adaptá e tarifanan pa konekshon (tarifa pa un konekshon nobo) solamente pa inflashon.
E tarifa pa rekonekshon a keda igual na USD 40,-.
Pa tene kuenta ku elektrisidat i awa di bebe mester keda pagabel pa partikularmente kasnan di famia chikitu, ministerio di Asuntunan Ekonómiko i Klima i ministerio di Infrastruktura i Maneho di Awa tin e posibilidat pa baha e tarifa pa uzo fiho pa elektrisidat pa medio di supsidio. Asina anunsiá e medidanan di supsidio akí , SEC lo informá su klientenan tokante e tarifanan ku e ta bai kobra entrante promé di yanüari.
Pa tene kuenta ku elektrisidat i awa di bebe mester keda pagabel, partikularmente pa kas di famia chikitu, ministerio di Ekonomia i Klima a palabra ku lo baha e tarifa figo pa elektrisidat i pa awa di bebe pa medio di supsidio. Manera e repartishon di kategoria di tarifa ta konosí, SABA Electric lo informá su klientenan tokante e tarifanan ku lo bai kobra entrante promé di yanüari.