ACM ta publiká tarifanan máksimo pa elektrisidat i awa di bebe 2019 pa Sint Eustatius
Autoriteit Consument en Markt (ACM) ta stipulá e tarifanan máksimo nobo pa elektrisidat i awa di bebe na Sint Eustatius entrante promé di yanüari 2019. Ta trata di e tarifa di uzo fiho i e tarifa di uzo variabel ku St. Eustatius Utility Company NV (STUCO) tin mag di kobra e konsumidó maksimal for di promé di yanüari 2019 pa kubri e gastunan di produkshon i suministro di elektrisidat i awa di bebe. Tambe ACM ta stipulá e tarifa pa konekshon i rekonekshon pa 2019.
Basá riba e Lei elektrisidat i awa di bebe BES (Wet elektriciteit en drinkwater BES), ACM tin e tarea pa kada aña stipulá tarifanan ku ta kubri e gastunan. Esei ta nifiká ku ACM a kalkulá kiko ta kosta STUCO pa produsí elektrisidat i awa di bebe i suministrá esakinan na e konsumidó. ACM ta publiká e desishonnan di tarifa pa elektrisidat i awa di bebe riba e wèpsait di ACM.
Kambionan den tarifanan
Na Sint Eustatius e tarifa di uzo variabel pa elektrisidat ta baha di 0,3105 USD/kWh pa 0,2965 USD/kWh. E gastunan pa e tarifa di uzo fiho pa elektrisidat ta subi: pa konsumidónan ku e kapasidat di konekshon mas abou esaki ta alrededor di USD 1 pa luna adishonal.
Pa awa di bebe e tarifa di uzo variabel ta baha na Sint Eustatius di USD 8,34 pa USD 7,87 pa meter kúbiko di awa di bebe. E bahada aki ta okashoná pa motibu di e produkshon ku a subi: ta repartí e gastunan fiho pa produkshon di awa di bebe riba un kantidat mas grandi di awa di bebe, ku ta pone ku e gastunan pa meter kúbiko di awa di bebe ta baha.
E gastunan pa e tarifa di uzo fiho pa awa di bebe a baha: di USD 71,06 pa USD 69,92 pa konekshon pa luna (sin konta supsidio). A adaptá e tarifanan pa konekshon (tarifa pa un konekshon nobo) solamente pa inflashon.
E tarifa pa rekonekshon a keda igual na USD 40,-.
Pa tene kuenta ku elektrisidat i awa di bebe mester keda pagabel pa partikularmente kasnan di famia chikitu, ministerio di Asuntunan Ekonómiko i Klima i ministerio di Infrastruktura i Maneho di Awa tin e posibilidat pa baha e tarifa pa uzo fiho pa elektrisidat i pa awa di bebe pa medio di supsidio. Asina anunsiá e medidanan di supsidio akí, STUCO lo informá su klientenan tokante e tarifanan ku e ta bai kobra entrante promé di yanüari.