Eksperimento garantia di hipotek pa Boneiru ta inisiá
Ministerio di Asuntu Interno i Relashon den Reino (BZK) ta inisiá ku un eksperimento rondó di garantia di hipotek na Boneiru den transkurso di 2019. E areglo aki mester stimulá esnan ku ke kuminsá yega na nan promé kas, famianan yòn i e klase sosial medio. E eksperimento aki ku tin un durashon di 5 aña, ta ehekushon di un di e palabrashonnan hasí den e akuerdo intergubernamental ku resientemente a firma na Boneiru.
Vários reto rondó di finansiamentu pa kompra di un bibienda ta hasi difísil pa kumpra un kas na Hulanda Karibense. Por ehèmpel bankonan normalmente ta finansiá solamente 80% di e balor di e bibienda. Esaki ta pone ku kumpradónan potensial di bibienda mester kontribuí ku un suma supstansial riba nan mes. Banda di esei e periodo di pago ta te ku máksimo e edat di 65 aña t lokual ta pone ku despues di e edat di 35 aña ta bira difísil pa sera un hipotek.
Na Hulanda Europeo ‘Nationale Hypotheek Garantie’ (NHG), ta stimulá kompra di bibienda pagabel i aksesibel. E areglo aki ta limitá e riesgonan finansiero pa kompra di un kas. Banda di esei hopi biaha esaki ta bai huntu ku un deskuento di interes pasobra e riesgo di banko ta mas chikitu. Un areglo di garantia di hipotek por brinda oportunidat na e islanan tambe.
No por implementá NHG manera konosé esaki na Hulanda sin mas. Na Hulanda Karibense por ehèmpel no konosé un asina yamá ‘Bureau Krediet Registratie’ (BKR) kaminda banko por kontrolá e konfiabilidat di krédito di e kliente. Riba enkargo di BZK, ‘Waarborgfonds Eigen Woningen’ (WEW) a traha riba un areglo adaptá. Pa e posibel riesgonan adishonal a tuma algun medida:
- E eksperimento aki pa awor ta aplikabel solamente pa Boneiru;
- Solamente bankonan ku ta kai bou di supervishon di DNB por duna e servisio aki;
- Ta trata di un máksimo di 350 garantia pa e periodo total ku un máksimo di 70 garantia pa aña;
- E nivel máksimo di gastu pa Boneiru ta 225.000 USD;
- E durashon di e garantia ta pa máksimo 30 aña;
- Mester paga e fiansa di forma anual òf pago linear dentro di 30 aña;
- Solamente personanan ku tin trabou ku un kontrakt pa tempu indefiní ta haña oportunidat pa sera un hipotek bou di e areglo di garantia di hipotek;
- E eksperimento ta solamente pa kompra di un bibienda eksistente òf konstrukshon di un bibienda nobo;
- Meskos ku na Hulanda ta apliká un prima òf mihó bisá un provishon di garantia;
- E suma máksimo ku por fia ta 100% di e balor di e bibienda.
Durante di e eksperimento, Gabinete Hulandes, di forma kontrolá i responsabel, por sigui investigá e posibilidatnan di e garantia di hipotek na Hulanda Karibense. Lo monitòr i evaluá e efektonan di e eksperimento den e añanan binidero. Aki tambe lo wak ku por implementá e garantia di hipotek despues pa Saba i Sint Eustatius.