Inisio di kampaña pa elekshon di kolegionan elektoral pa Eerste Kamer
Un kambio konstitushonal resien ta pone ku e islanan Boneiru, Sint Eustatius i Saba entrante 2019, meskos ku tur otro parti di Hulanda, por ehersé influensia riba konstelashon di Eerste Kamer. Relashoná ku esaki ta instituí un asina yamá kolegio elektoral pa Eerste Kamer riba kada isla. E kolegio elektoral akí ta konsistí di representantenan di pueblo kende huntu ku e miembronan di ‘provinciale staten’ ta vota pa e miembronan di Eerste Kamer.
Parlamento hulandes ta konsistí di dos Kámara: Eerste Kamer i Tweede Kamer. Tweede Kamer por entregá, kambia i aprobá proposishonnan di lei. Eerste Kamer ta vota riba proposishonnan di lei ku Tweede Kamer ya a aseptá. Kontrali na Tweede Kamer, miembronan di Eerste Kamer no ta ser skohé direktamente dor di e poblashon hulandes, sino dor di ‘provinciale staten’ i, entrante 2019, tambe dor di miembronan di kolegionan elektoral.
Un miembro di un kolegio elektoral tin solamente e tarea pa skohe e miembronan di Eerste Kamer i di ningun forma ta embolbí den ehekushon di e tareanan gubernamental di e entidat públiko. Habitantenan ku nashonalidat hulandes por postulá nan mes komo kandidato pa e kolegio elektoral di e isla unda e ta biba te 4 di febrüari 2019. Riba 20 di mart 2019 e elekshon pa kolegio elektoral ta tuma lugá i habitantenan ku nashonalidat hulandes por vota riba e miembronan di e kolegionan elektoral. Esaki ta riba mes dia ku e elekshon di konseho insular ta tuma lugá na Boneiru i Saba.
E siman akí RCN ta start ku un kampaña di informashon pa informá habitantenan ku derecho di voto pasivo, tokante postulashon komo kandidato. Relashoná ku esaki ta hasi uso di diferente medionan di komunikashon, manera aviso-, spòt na radio i televishon i Facebook. Kandidatonan potensial i esnan ku derechi di voto por bai tambe riba www.rijksdienstcn.com/kolegioelektoral2019 pa mas informashon.
RCN ta ehekutá e kampaña di informashon riba enkargo di minister di Asuntunan Interno i Relashon di Reino. E entidatnan públiko ta responsabel pa organisashon di e elekshonnan.