Dia di Kuido di Kriansa yená ku amor i goso
Djadumingu 2 di desèmber Kuido pa Hóben i Bienestar di Famia (JGCN), a selebrá un dia di Kuido di Kriansa inolvidabel huntu ku e mayornan di kriansa.
E dia di Kuido di Kriansa a enfoká prinsipalmente riba e mayornan di kriansa i e trabou gradesido ku nan ta hasi. Tema di e dia spesial aki tabata ‘Asina un kabuya bieu ta mara e kabuya nobo’. E programa di dia a konsistí di aktividat di famia, un almuerso sabroso i regalonan grasioso pa asina pone e famianan di kriansa den spòtlait. Pasó ta dor di nan gran dedikashon i empeño nan ta hasi un diferensia yen di amor den bida di muchanan gradesido.
Durante di aña JGCN ta buska mayornan di kriansa, pa kaminda ku tin e nesesidat, yuda muchanan yega na un di dos kas. Pa ta mayor di kriansa ta un tarea balente pero tierno i ta hasí esaki di kurason. P’esei riba e dia spesial aki JGCN, ku kurason pa e mucha, a demonstrá nan gratitut i di e manera aki a aserká e potensial mayornan di kriansa.
JGCN ta mira bèk riba un dia eksitoso i ta gradisí mayornan di kriansa i boluntarionan pa nan presensia.
Bo tin interes pa ta mayor di kriansa òf bo ke mas informashon? E ora ei por tuma kontakto ku JGCN via 715-7201 òf manda nos un meil na info.jeugdzorgcn@jeugdzorgcn.com.