Défisitnan komersial di Hulanda Karibense kresiendo
E défisitnan komersial di Boneiru, Sint Eustatius i Saba a oumentá den 2017. Na Sint Eustatius e défisit a krese proporshonalmente mas fuerte. Esaki CBS ta informá a base di sifranan nobo.
Boneiru, Sint Eustatius i Saba tin un défisit komersial struktural. Esei ta e kaso ora importashon ta mas grandi ku eksportashon. Riba e islanan ta produsí relativamente poko kompará ku Hulanda Oropeo.
Défisit di Sint Eustatius un i mei bes mas grandi
Den 2017 e défisit komersial di Sint Eustatius tabata 52 mion dòler, 50 porshento mas haltu ku e balor di e aña anterior. Sint Eustatius a importá 50 porshento mas tantu (55 mion dòler) i a eksportá 58 porshento mas tantu na merkansia (2,5 mion dòler) ku den 2016. Den e último kuartal e balor di importashon tabata esun di mas haltu ku 15 mion dòler.
Saba: importashon mas haltu, eksportashon mas abou
Na Saba importashon tabata mas haltu ku e balor di 2016 i eksportashon mas abou ku esei. Den 2017 e défisit komersial di e isla tabata 17 mion dòler, un oumento di 7 porshento. Saba a nota e balor di importashon mas haltu den e di dos kuartal.
Balor di importashon Boneiru den e di kuater kuartal esun di mas haltu
E défisit komersial di Boneiru tabata 202 mion dòler den 2017 i ku esei tabata 5 porshento mas grandi ku den 2016. Tantu e balor di importashon komo eksportashon a oumentá. Boneiru a importá merkansia na balor di 60 mion dòler den e di kuater kuartal. Esaki tabata e balor di kuartal mas haltu den 2017, i tambe e balor di importashon di mas haltu desde e promé kalkulashonnan den 2011.
Boneiru ta importá ménos na produktonan fabriká
Boneiru a importá pa 213 mion dòler na merkansia durante 2017, 6 porshento mas ku den 2016. E balornan di importashon di kasi tur sekshon di merkansia tabata mas haltu. E balornan di importashon di mashin i ekipo di transporte i di kombustibel mineral a oumentá mas ku tur.
Solamente a importá ménos na produkto fabriká i produktonan kímiko.
Eksportashon di Boneiru a krese den 2017 ku 25 porshento te na 11 mion dòler. E balor di eksportashon a oumentá mas hopi, te na 3,5 mion dòler den 2017. Na 2016 a eksportá un balor mas haltu na salu.
Fuentenan
Hulanda Karibense; balor di importashon i eksportashon i saldo komersial pa kada isla
Hulandes: https://opendata.cbs.nl/statline/#/CBS/nl/dataset/82658ned
Ingles: https://opendata.cbs.nl/statline/#/CBS/nl/dataset/82658eng
Hulanda Karibense, Boneiru; balor di importtashon, eksportashon i saldo komersial, SITC
Hulandes: https://opendata.cbs.nl/statline/#/CBS/nl/dataset/82659ned
Ingles: https://opendata.cbs.nl/statline/#/CBS/nl/dataset/82659eng
Lenknan relevante
Maatwerktabel – Produkto importá for di Venezuela
Splikashon
Balansa komersial:
E saldo di eksportashon i importashon di merkansia.
Défisit komersial:
Mas importashon kompará ku eksportashon di merkansia.