BOPEC bou di supervishon agudisá di ILT i RWS
Inspekshon di ambiente di bida i transporte (ILT) aktualmente no ta imponé e ‘last onder bestuursdwang (LOB)’ previsto riba Bonaire Petroleum Corportation N.V. (BOPEC). Na e momentunan aki Rijkswaterstaat (RWS) tampoko lo no para e uso di pirnan na e kompania. E empresa di almasenamentu di ‘fuel-oil’ na Boneiru si ta bai bou di supervishon agudisá (mas skèrpi). Esaki ILT i RWS ta mèldu despues di un bishita di verifikashon siman pasá ku a dura algun dia.
Durante di e bishita di ILT, BOPEC por a demonstrá ku e ta disponé di e medionan finansiero nesesario pa hasi e mantenshon atrasá di mas importante ku urgensia. E empresa ya a inisiá ku e restorashon di loke nan ku falta ku ta trese rísikonan kuné pa hende i medioambiente. E supervishon agudisá ta sòru pa esakinan wòrdu hasí na un manera korekto i seif. Ademas, BOPEC a aprobá un paro operativo di e terminal pa e mantenshon grandi nesesario.
E supervishon agudisá ta konsistí di vários inspekshon den 2018 di moda ku por monitor intensivamente si BOPEC ta tuma e pasonan nesesario pa kumpli ku e regulashonnan na vigor riba un término kòrtiku. Ademas, ta imponé vários ‘lasten onder dwangsom (LOD)’ riba e empresa. Esaki ta mantené e preshon haltu riba e progreso di e trabounan di reparashon mas urgente i nesesario. Ora ku e situashon ta eksigí, por anunsiá e ‘last onder bestuursdwang’ dinobo òf den kaso di peliger grave apliká esaki inmediatamente.
Pèrmitnan
BOPEC for di 1974 ta establesé na Boneiru. E empresa tin un pèrmit ambiental for di 2014, pero tin retraso grandi den e mantenshon di tankinan di almasenamentu, pirnan, tuberianan i instalashonnan eléktriko.
Inspekshon
For di 2014 ta hasi inspekshon na Boneiru na e tres kompanianan di almasenamentu i trasbordo di kombustibel (BOPEC, Curoil Hato i Curoil Airport, paso e isla na fin di aña 2010 a bira un munisipio Hulandes spesial. ILT konhuntamente ku RWS i brantwer (Veiligheidsregio Rotterdam Rijnmond, na nòmber di Brandweer Caribisch Nederland) ta hasi e inspekshonnan. Inspekshon di Asuntunan Sosial i Labor tambe ta uni su mes atrobe na e inspekshonnan.