ACM ta publiká tarifanan máksimo pa elektrisidat i awa di bebe na Boneiru
Autoriteit Consument en Markt (ACM) den desèmber 2017 a stipulá tarifanan máksimo pa distribushon di elektrisidat i awa di bebe ku lo bai apliká entrante promé di aprel 2018 na Boneiru. E ministerio di Infrastruktura i Maneho di Awa i e ministerio di Asuntunan Ekonómiko i Klima ta bai tuma medidanan di supsidio pa limitá e konsekuensianan negativo di e struktura di tarifa nobo mas tantu posibel. E medidanan aki lo ta mas klaro medio mart.
ACM lo publiká e dekretonan di tarifa pa elektrisidat i awa di bebe riba e wèpsait di ACM. Den esaki tin e tarifanan máksimo ku ta kubri tur gastu, ku WEB N.V. entrante di promé di aprel por kobra su klientenan. Debí na e supsidionan disponibel, e berdadero tarifanan ku WEB por kobra lo ta mas abou. Asina ku publiká e medidanan di supsidio, WEB lo informá su klientenan tokante di e tarifanan ku nan lo bai kobra entrante promé di aprel.
ACM a base di e Lei elektrisidat i awa di bebe BES tin e tarea pa stipulá e tarifanan ku ta kubri tur gastu. Entrante promé di aprel lo introdusí un sistema di tarifa nobo ku ta enserá un tarifa fiho i un tarifa variabel pa uso. Komo supervisor independiente ACM ta kalkulá a base di e reglanan di lei kua gastunan WEB ta hasi pa produkshon i distribushon di elektrisidat i awa di bebe.
E ta na interes di Boneiru pa WEB ta un kompania finansieramente stabil ku su gastunan ta keda kompensá, inkluso un rendimentu rasonabel riba su invershonnan. Asina aki WEB ta haña sufisiente entrada pa mantené e ret, hasi invershon den e ret i pa kumpra òf produsí elektrisidat i awa di bebe. Di otro banda e stipulashon di e tarifanan máksimo dor di ACM ta sòru tambe pa WEB no kobra e konsumidó mas ku e tarifanan máksimo ku ta kubri tur gastu.
Por haña e dekretonan di ACM i e modèl di kalkulo riba e wèpsait di ACM:
www.acm.nl/caribisch-nederland
Wak tambe:
Tarifnan Awa di bebe i Elektrisidat 2018
Pregunta frekuentemente hasi tokante e sistema di tarifa nobo pa Elektrisidat i Awa di bebe Boneiru