Gobièrnu Sentral ta intervení na Sint Eustatius

Notisia | 05-02-2018 | 15:38

E proposishon di lei ta regla ku ta disolvé Konseho Insular i ta baha e diputadonan i gezaghèber interino for di nan funshon. Ta nòmbra un Komisario di gobièrnu sentral ku lo sòru pa gobernashon di Sint Eustatius. E intervenshon aki ta un reakshon riba e rapòrt di e “Komishon di Sabionan” ku a konstatá un “negligensia grandi di tareanan”.  E negligensia ta bai akosto di suidadanonan i empresanan na e isla.

Punto di prekupashon

E situashon di gobernashon na Sint Eustatius pa basta tempu ta un punto di prekupashon. Medidanan ku a tuma anteriormente pa mehorashon di e situashon no a duna e resultadonan deseá. E Minister di Asuntunan Interno i Relashonnan den Reino di e tempu ei a instalá un Komishon di Sabionan pa asina analisá e problemanan i pa duna rekomendashon. E komishon, konsistiendo di señor F.J. Refunjol i señor J. Franssen, a konkluí ku gobièrnu di  Sint Eustatius a sali for di òrdu legal.

Intervení

E situashon gubernamental na e momentunan aki ta karekterisá su mes pa anarkia i  mal maneho finansiero, pero tambe pa diskriminashon, intimidashon, menasa i ofensa, dunamentu di preferensia, i ekseso di poder personal a kosto di e habitantenan di Sint Eustatius. E komishon a konkluí ku por papia di gran negligensia di tareanan i ta konsehá pa gobièrnu di Hulanda intervení riba nivel gubernamental.

E situashon gubernamental tin konsekuensianan pa e bida diario di e komunidat di  Sint Eustatius. Suidadanonan i empresarionan ta eksperensiá desigualdat legal. Niun atministrashon ta na òrdu i e isla ta den un dekandensia físiko. 
“Konsiderando ku otro medidanan no a soru pa e gobièrnu kambia di direkshon, a keda un solo solushon: intervenshon gubernamental. Esaki ta e medida di mas pisá pero awor ku tur otro opshon a frakasá esaki ta keda komo e úniko solushon.  E hendenan di Sint Eustatius meresé mihó”. Segun Sekretario di Estado Knops. E siman aki e ta biaha pa e isla pa asina duna informashon na komunidat di e desishon. 

Kritiko

E Komishon di Sabionan ta krítiko tambe riba e ròl di gobièrnu di Reino pa ku e situashon aktual ku a surgi. Den sierto parti e situashon gubernamental di e isla i e konsekuensinan ta debí na e relashon entre Hulanda i  Sint Eustatius. Durante e  último añanan aki a surgi un retraso den proyektonan pa mehorashon di kayanan, suministrashon di awa, bibienda, tuberia bou di tera, prosesamentu di sushi i e haf i aeropuerto.  Mester atendé ku e retrasona aki.  Siguiendo e konseho di e komishon lo aselerá invershonnan ku mester keda hasí.

Den su konseho na gobièrnu sentral tokante e proposishon di lei, Raad van State (Hunta di Estado) ta enfatisá ku por papia di negligensia grandi di tarea. E Hunta ta di akuerdo ku e medidanan proponé. Riba konseho di e Hunta a adaptá i aklará sierto partinan di e proposishon di lei i e splikashonnan.

E Komisario di Gobièrnu Sentral lo ehekutá tur tarea i outoridat di e gobernashon di e isla. Esaki lo dura te na momentu ku e gobièrnu di Sint Eustatius mes ta kapabel atrobe pa kumpli ku su responsabilidatnan di un forma korekto. Te na momentu ku esaki ta e kaso, lo tin elekshon pa skohe un Konseho Insular nobo pa asina un gobièrnu nobo por sinta.