Siman pasa 27 di yanuari dòkter nan di kas di Boneiru, a firma un karta di intenshon ku Ofisina di Seguro di Kuido Hulanda Karibense (ZVK).
E dòkternan di kas di Boneiru, Lont, Bernabela, Castro de Castro Palomina, Castro Tase, Schräder, Van der Vaart, Hermelijn i Miranda despues di a firma prolongashon di nan kontrato di trabou ku ZVK, den presensia di direktor di ZVK, mr. Angel Bermudez, Gert-Jan Ter Braak, hefe di konseho mediko i Rex van Ingen, ‘accountmanager’ kuido di ZVK.
Pa medio di e karta di intenshon akita hasi vários palabrashon pa garantisá kuido di dokter di kas na Boneiru den futuro.
Asina e partidonan a palabra ku lo hasi esfuerso pa yega na un akuerdo di trabou di mas aña. Den kuadro di esaki a palabra vários komponente ku lo sigui alsa kalidat di kuido di dokter di kas mas. Tambe a papia riba maneranan pa redusí e preshon di trabou di dòkternan di kas, maneho di establesimentu di dòkternan na Boneiru i definí indikadónan di prestashon (norma pa midi prestashon).
ZVK ta hopi satisfecho ku e paso importante ku a dal aki i ta mira kolaborashon ku dòkternan di kas di Boneiru den futuro ku hopi konfiansa.