CBS ta inisiá enkuesta Kuenta Nashonal Hulanda Karibense 2016
Pa e próksimo lunanan Ofisina Sentral di Estadístika (CBS) lo ehekutá un investigashon di rendimentu i gastunan di produkshon bou di sektor empresarial riba e islanan di Hulanda Karibense, komo parti di enkuesta riba Kuenta Nashonal. E investigashon aki tin komo meta pa hasi un inventarisashon di desaroyo ekonómiko riba e tres islanan. CBS lo aserká e organisashonan riba e tres islanan pa kompletá e kuestionario.
Na Saba i Sint Eustatius lo aserká tur organisashon ku ta realisá aktividatnan ekonómiko. Pa loke ta trata Boneiru gran parti di e investigashon lo ta ehekutá a base di diferente fuentenan aksesibel, pa di tal manera alivia e organisashonnan mas tantu posibel. E organisashonan ku no por wòrdu investigá di e manera aki lo risibí un karta di CBS. Seguidamente lo publiká e resultadonan di e investigashon den di dos kuartal di aña 2016.
Algun resultado di e investigashon di 2015:
- E tamaño di ekonomia di Boneiru (bbp) pa loke ta trata aña 2015 ta 415 mion dòler merikano (USD). BBP di Sint Eustatius tabata na 2015 e suma di 102 mion dòler, i pa Saba esaki tabata 47 mion dòler. E BBP pa kabes di e poblashon pa Boneiru ta suma un kantidat di 21.700 dòler, 26.600 dòler pa Sint Eustatius i 24.900 dòler pa Saba.
- E ekonomia na Boneiru a krese ku 3,0 porshentu kompará ku e aña anterior. E ekonomia di Sint Eustatius a krese ku 2,1, porshentu i di Saba ku 1,6 porshentu.
Pa por garantisá éksito di e investigashon riba tur tres isla, CBS ta pidi kooperashon di tur organisashon selektá.
Pa lei, CBS tin e obligashon di trata na un manera estriktamente konfidensial tur dato rekolektá.
CBS ta gradisí tur organisashon di antemano pa nan koperashon i ta informá tambe ku den kaso di ta nesesario por yuda ku kompletá e kuestionario.
Pa mas informashon i pregunta por tuma kontakto ku nos ofisina na Boneiru.