Direktor General di aksesibilidat ta finalisá bishita na Sint Eustatius
Direktor General di aksesibilidat na e ministerio di Infrastruktura i Maneho di Awa (I&W), señor Mark Frequin, riba djaweps promé di mart 2018 a finalisá su bishita na Sint Eustatius. Frequin i su delegashon ku ta konsistí di konseheronan di e ministerio di Asuntunan Interior i Relashonnan den Reino (BZK) i Infrastruktura i Maneho di Awa tei huntu riba un bishita di trabou komo representantenan di e ‘grupo di trabou Hulanda Karibense- Stuurgroep CN’.
Durante su bishita na Sint Eustatius Frequin a bishitá vários proyekto di infrastruktura i medio ambiente manera prosesamentu di sushi, haf, Fort Oranje, e proyekto protekshon di klef Bay Path i rekonstrukshon di kasnan afektá pa orkannan Irma i Maria. A papia ku tim di maneho di Nustar, St. Eustatius Utilities Company (STUCO) i departamento di asuntunan sosial di RCN (SZW). Tambe tabatin un rekorido di áreanan di klef banda di e pista di aterisahe di FDR Airport, ku ta afektá pa eroshon.
Tambe tabatin un enkuentro ku Mike Franco i Mervyn Stegers, respektivamente komisario di gobièrnu sentral i su suplente pa papia tokante di proyektonan di rekonstrukshon despues di orkannan i otro proyektonan. Frequin a informá ámbos persona ku di parti di gobièrnu sentral ta ofresé sosten tékniko ku ta nesesario pa yuda Sint Eustatius.
“Sint Eustatius ta den un estado di rekuperashon. Nos a tuma nota ku algun proyekto di infrastruktura i medio ambiente ta importante pa desaroyo di e isla. Nos ta traha huntu ku otro pa logra e metanan aki’, Frequin a bisa. Ora e regresá Hulanda otro siman e direktor general lo kompartí su eksperensia ku su koleganan di e grupo di trabou Hulanda Karibense. Esaki ta un grupo di ámtenarnan tòp di vários ministerio ku ta reuní regularmente pa papia tokante proyektonan i invershonnan pa Saba, Sint Eustatius i Boneiru, pa asina sòru pa un aserkamentu strukturá i kordiná.
Frequin a kontinuá su bishita di trabou na Boneiru ku ta su último stòp kaminda e lo papia ku vários persona i organisashon i ku representantenan di gobernashon di Boneiru.