Mas informashon riba e implikashonnan di Ordenansa pa Protekshon General di Data
Kralendijk, 19 di mart 2018 - Entrante 25 di mei 2018, Ordenansa pa Protekshon General di Data lo drenta na vigor den henter Union Europeo. E ordenansa akí ta konta pa tur organisashon, grandi i chikitu, i tambe pa empresa independiente sin personal ku ta prosesá dato personal. Na Boneiru, Sint Eustatius i Saba, e leinan di privasidat aktual lo keda vigente, ma e organisashonnan establesé aki lo ripará sierto konsekuensia di e ordenansa nobo di Union Europeo. P’esei, Outoridat pa Supervishon i Protekshon di Dato Personal BES lo duna mas informashon tokante e implikashonnan di e ordenansa akí.
Aplikashon di e ordenansa nobo ta nifiká ku entrante di 25 di mei, pasamentu i interkambio di dato personal ku pais pafó di Union Europeo, entre otro Boneiru, St.-Eustatius i Saba, lo ta mará na kondishonnan mas stringente. ‘Tin hopi organisashon ku ta rekolektá i pasa dato sensitivo pa organisashonnan ku ta den Union Europeo. Ta importante pa nos identifiká na tempu kiko lo ta e konsekuensianan ku aplikashon di e ordenansa nobo lo tin pa nos aki na Boneiru, Sint Eustatius i Saba,’ segun Roëlla Pourier di Sekretariado di Outoridat pa Supervishon i Protekshon di Dato Personal.
Den e último añanan, mas i mas nos komunidat en general ta digitalisando e manera ku nos ta prosesá dato, i meskos ta konta pa komèrsio. E desaroyo ei ta trese hopi benefisio kuné, pero e tin su peligernan tambe, manera krímen sibernétiko, froude ku identidat, lèkmentu di informashon i otro delitonan ekonómiko relashoná ku uso di dato digital. Debí ku interkambio di dato personal den forma digital ta oumentá e riesgo di froude, Union Europeo a oumentá tambe e nivel di protekshon di privasidat di dato.
Esei ta nifiká ademas ku entrante 25 di mei, tur pais ku kua Union Europeo ta interkambiá informashon mester tin un nivel apropiá di protekshon di privasidat. Ku otro palabra, na Boneiru, Sint Eustatius i Saba tambe mester tin un maneho di privasidat komparabel na e reglanan di Ordenansa pa Protekshon General di Data di Union Europeo. E leinan di privasidat ku nos tin aktualmente ya ta kumpli ku e rekisitonan akí den hopi kaso, ma medida adishonal ta nesesario. Kiko e medidanan ei ta lo bira tópiko di diferente seshon di informashon ku Outoridat pa Supervishon i Protekshon di Dato Personal lo ofresé den e lunanan benidero.
Pourier: “Nos ta hasi un apelashon na tur organisashon ku ta eksperensiando difikultat den aplikashon di e leinan di privasidat pa mèldu esakinan na Sekretariado. Esei lo permití nos adaptá e seshonnan di informashon ku nos ta preparando na e preguntanan ku por tin al respekto.” Si bo kier mèldu e difikultatnan ku bo ta topa riba e tereno akí òf ta deseá mas informashon riba e ordenansa europeo nobo, tuma kontakto ku Roëlla Pourier di Sekretariado: roella.pourier@rijksdienstcn.com, telefòn +599 715 8392.