Grapperhaus i Knops a bishitá Sint Eustatius
E minister di Hustisia i Siguridat, señor Ferdinand Grapperhaus i e Sekretario di Estado di e Ministerio di Asuntunan Interior i Relashonnan den Reino, señor Raymond Knops a hiba un bishita na Sint Eustatius riba djadumingu 29 i djaluna 30 di aprel. E bishita tabata den kuadro di rekonstrukshon di e isla den e konteksto mas amplio di e palabra. Tantu e minister komo e sekretario di estado tabata kontentu ku e kombersashonnan ku nan a hiba ku ‘stakeholdersnan’ di gobièrnu i di sektor públiko.
Grapperhaus i Knops ta di opinion ku ta importante pa skucha for di primera mano kua ta e kuestion-, reto- i preokupashonnan importante ku ta biba na Sint Eustatius. Den e kuadro aki tabatin reunionnan ku brantwer, e kuerpo polisial Hulanda karibense, mènedjernan di e unidat i hefenan di departamento di e gobièrnu lokal. “St. Eustatius Community Care” i salú públiko, kordinadó derechonan di mucha i e konseho di asesor i Stenapa (St. Eustatius National Parks Foundation).
“Mi a mira kon e Komisario di Gobièrnu, e sosiedat sivil i e aparato atministrativo konhuntamente ta dirigí nan mes riba e pueblo di Sint Eustatius, tambe riba e personanan ku mas mester di kuido. Mi ta despedí di Sint Eustatius ku un bon sintimentu ku tur kos lo kai na su lugá”, minister Grapperhaus a splika.
E gobièrnu hulandes ta traha huntu ku e komisarionan di gobièrnu na e rekonstrukshon di Sint Eustatius despues di e impakto di e orkannan Irma i Maria ku den sèptèmber 2017 a asotá e isla. Banda di rekonstrukshon di kasnan tambe ta hasi invershon den e refuerso di e kapasidat atministrativo i finansiero di e gobièrnu lokal. Ademas reforsá e aparato atministrativo ta di sumo importansia. “Ta alentador pa mira kon motivá tur hende ta pa konhuntamente traha na un mihó Statia. E reunionnan ku e konseho di asesor i e mènedjernan di unidat tabata habrí i ku kontenido. Ta enkurashá empleadonan públiko pa pensa “out of the box”, ta kreativo i traha plannan konkreto pa término largu. Segun señor Knops: “Progreso visibel ta importante pa e hendenan di Statia i esei ta loke nan meresé”.