Ordenansa pa Protekshon General di Data na vigor entrante awe
Awe Ordenansa pa Protekshon General di Data (na hulandes, AVG) ta drenta na vigor pa henter Union Europeo (UE). AVG ta regulá prosesamentu di dato personal den tur organisashon, grandi i chikitu. Aunke na Hulanda Karibense e leinan aktual di privasidat lo keda na vigor, aki tambe nos lo sinti efekto di e ordenansa nobo akí.
Entrante awe, pasamentu i interkambio di dato personal ku e paisnan di UE lo ta mará na regla mas stringente. Meta di esaki ta di limitá e riesgo di froude ku dato personal (digitalisá) i logra pa tur pais ku UE ta interkambiá informashon kuné tin un nivel adekuá di protekshon di privasidat. Esei ta konta tambe pa Boneiru, St.-Eustatius i Saba.
Riba wèpsait di Outoridat pa Supervishon i Protekshon di Dato Personal BES, tin informashon ku ta splika kiko esaki lo nifiká pa kada ken ku ta registrá òf pasa dato personal pa otro. Roëlla Pourier di Sekretariado di Outoridat pa Supervishon, ta komentá lo siguiente: ‘Por ehèmpel, AVG ta fiha regla muchu mas stringente pa loke ta trata pidimentu di pèrmit pa atendé ku dato personal. Bo mester por mustra ku bo a risibí outorisashon bálido di e persona konserní pa prosesá su datonan personal, kiko bo ta bai hasi ku e informashon i ken bo ta bai kompartié kuné’.
Outoridat pa Supervishon ta traha ku otro organisashonnan di supervishon pa asina vigilá kua ta e konsekuensianan ku AVG por tin pa e islanan akí i komuniká e informashon akí tantu na e organisashonnan komo na siudadania. Entre otro, lo tin mas seshon informativo i lo publiká flyer riba e wèpsait, splikando kon tin ku atendé ku e kambio akí. Tambe, por baha e foyeto ‘Loke bo mester sa di AVG’ for di e wèpsait www.cbpbes.com. Outoridat pa Supervishon ta interesá di sa di kualke difikultat ku presentá riba e tereno akí, pa por traha riba esei.
Bo ke raportá difikultat ku bo ta eksperensiá riba e tereno akí, òf bo ke mas informashon riba e AVG nobo na Europa? Tuma kontakto ku Roëlla Pourier di Sekretariado: roella.pourier@rijksdienstcn.com, telefòn +599 7158392.