OLB i RCN ta traha huntu pa yuda mayornan ku kompra di artíkulonan pa skol

Sekshon di Sosten Sosial i Mediashon pa merkado laboral (MOA) di OLB i unidat di Asuntunan Sosial i Empleo (SZW) di RCN huntu ta bai yuda mayor- i mayornan di kriansa di muchanan ku ta bai skol ku kompra di artíkulonan pa skol i unifòrmnan di skol. Por pidi un kompensashon serka MOA pa muchanan ku ta bai enseñansa básiko i serka SZW pa muchanan ku ta bai SGB. Pa hasié mas fásil pa e siudadano, e aña akí ta tene momentunan pa hasi petishon konhunto.

artíkulo di skol

SZW a hisa e norma di entrada pa bin na remarke pa un kompensashon na maksimal $1250 nèto pa luna pa kas di famia. Si tin mas mucha den un famia ku ta bai SGB, e norma di entrada ta mas haltu.

Mayor- i mayornan di kriansa ku tin yunan den enseñansa básiko, òf yunan den tantu enseñansa básiko komo na SGB, por hasi uso di momentunan pa hasi petishon ku MOA i SZW ta tene konhunto. Esakinan ta tuma lugá di 14 te ku 18 di mei na Plasa Chiku Goeloe na Antriol i riba 20 i 21 di mei den e Ofisina ouksiliar di gobièrnu na Rincon di 13:30 te 19:30 or. Pa hasi entrega di e petishon pa únikamente muchanan ku ta bai SGB, mayornan ta bonbiní durante e oranan di konsulta regular di e sekshon di Ònderstant den e ofisina di SZW riba djamars, djárason i djaweps entre 8.00 i 10.00 or, òf durante e konsultanan èkstra den luna di yüni riba djaluna i djabièrnè entre 14.00 i 16.00 or.

Petishonarionan mester trese un sédula bálido, slepnan di salario di e último dos lunanan, estadonan di kuenta bankario di e último dos lunanan i un buki di kasamentu òf buki di famia. Pa muchanan di skol básiko, nan mester trese e deklarashon di skol i pa muchanan ku ta bai SGB un prueba di inskripshon òf e último rapòrt di skol básiko. Un tutor òf representante legítimo mester bin ku e desishon for di kua ta resultá ku e ta kuida e yu.

Pa mas informashon por tuma kontakto ku:
Enseñansa básiko                                                      
OLB sekshon MOA:                                                  
+599 7172211                                                                      
schoolbenodigdheden@bonairegov.com                 
Kaya Neerlandia 41                                                  
www.bonairegov.com                                               

Enseñansa avansá 
unidat SZW di RCN:
+599 715 8888
onderstand@rijksdienstcn.com
Centrumgebied z/n, Bonaire
www.rijksdienstcn.com