CBS: 6 di kada 10 hulandes karibense tin sobrepeso
Un di kada seis habitante di Hulanda Karibense ta huma, un di kada ocho ta un bebedó pisá i mas di seis di kada dies tin sobrepeso. Mitar di e habitantenan ta move sufisiente. Hende muhé ta huma i bebe muchu ménos ku hende hòmber, pero hopi bia nan tin sobrepeso grave (obesitas) i ta move ménos. Esaki ta sali na kla for di e Health Study ku a hasi den 2017 na Hulanda Karibense.
Huntu ku e departamentunan di Salubridat Públiko di e entidatnan públiko Boneiru, Sint Eustatius i Saba, CBS i RIVM a ehekutá un investigashon den 2017 pa mónitòr salubridat na Hulanda Karibense. A ehekutá e ‘Health Study Hulanda Karibense’ aki pa haña informashon tokante e estado di salú di e poblashon riba e islanan i di malesanan infeksioso komun. Banda di esaki a investigá si e poblashon ta bon protehá kontra malesanan infeksioso pa kua nan ta wòrdu bakuná den kuadro di e programa di bakunashon di gobièrnu hulandes. 1900 persona a partisipá na e investigashon.
Tiki humadó pisá
Di e habitantenan na Hulanda Karibense 17 porshento ta duna di konosé ku nan ta huma. Solamente 2 porshento ta huma pisá, un promedio di aloménos 20 sigaria pa dia. Hende muhé ta huma muchu ménos frekuente ku hende hòmber. E aktitut di humamentu ta diferensiá pa isla. Na Saba 24 porshento di e habitantenan ta huma, na Boneiru 17 porshento i na Sint Eustatius 13 porshento. Pa tur e islanan t’asina ku e kantidat di humadó pisá ta relativamente abou.
Na Hulanda Karibense 11 porshento di e habitantenan ku no ta huma, ta eksponé aloménos un ora pa dia na huma di tabako di otronan. Pa Boneiru e porsentahe ei ta 12, pa Sint Eustatius 3 i pa Saba 11. Muchanan tambe ta eksponé na huma di tabako di otronan. Asina ta sali na kla ku na Boneiru 9 porshento di esnan di 0- te 12 aña di edat tambe ta huma aloménos un ora pa dia pasivo, di esnan di 12 te 16 aña esei ta 14 porshento. Na Sint Eustatius i Saba ta parse ku muchanan ta ménos eksponé na huma di otronan.
Ménos bebedó pisá bou di hende muhé
Unu di kada ocho habitante di Hulanda Karibense ta bebe pisá. Di hende muhé esaki ta 8 porshento, di hòmber 17 porshento. Riba tur e tres islanan hende muhé ta bebe ménos alkohòl ku hende hòmber.
Na Sint Eustatius e porsentahe di personanan ku ta bebe pisá ta esun di mas abou, 8 porshento. Na Saba e porsentahe di personanan ku ta bebe pisá ta 16 i na Boneiru 12.
Hende hòmber ta move mas
Mitar (49 porshento) di e habitantenan di Hulanda Karibense ta kumpli ku e Norma hulandes di Move Salú. E porsentahe di hende hòmber ku ta kumpli ku e norma ta ku 59, mas haltu ku e porsentahe di hende muhé (38). Ta resultá ku na Saba hende muhé ta físikamente mas aktivo ku hende muhé na Boneiru i Sint Eustatius. Na Saba 58 porshento di hende muhé ta kumpli ku e norma di move, di hende muhé na Boneiru 38 porshento i di hende muhé na Sint Eustatius 32 porshento.
Kasi mitar di hende muhé na Sint Eustatius tin sobrepeso serio
Mas ku seis di kada 10 hulandes karibense tin sobrepeso, di kua mitar tin sobrepeso serio. Hende muhé i hende hòmber mes tantu bia tin sobrepeso, pero serka hende muhé e ta serio ku mas frekuensia. Di hende muhé, 36 porshento tin sobrepeso serio (obesitas), di hende hòmber 26 porshento. Na Sint Eustatius e porsentahe di hende muhé ku obesitas ta esun di mas haltu: 46 porshento.
Na Hulanda Karibense tin mas sobrepeso serio
No por hasi un komparashon zùiver entre e resultadonan ariba menshoná i e sifranan pa Hulanda Oropeo pa motibu di diferensianan metodológiko. Por konkluí sí ku na Hulanda Karibense tin ménos persona ta huma. Di otro banda t’asina ku esnan ku no ta huma ta inhalá konsiderablemente mas frekuente huma di otronan ku na Hulanda Oropeo (serka muchanan e porsentahe aki ta te asta 4 bes mas haltu). Banda di esei tin muchu mas sobrepeso serio na Hulanda Karibense. E porsentahe di obesitas na Hulanda Karibense ta aloménos dòbel mas tantu.
Fuentenan:
Tabèl di trabou na midí di estilo di bida HSCN i splikashon di definishonnan apliká
StatLine - Leefstijl en (preventief) gezondheidsonderzoek Europees Nederland
Health Study Hulanda Karibense
Esaki ta e promé resultadonan for di e Health Study Hulanda Karibense. Pa e boletin informativo aki e resultadonan ta konsentrá riba estilo di bida. Mas despues den aña e promé resultadonan di e investigashon di e grado di protekshon kontra malesanan infeksioso lo bira disponibel.
Lo usa e Health Study Hulanda Karibense ora di formulá e reportahe di salubridat públiko ku kada isla ta redaktá i e ta forma un base importante pa diseño di e maneho di salubridat di e islanan di parti di gobièrnu lokal. E informashon tokante komportashon insaludabel ta importante pasobra esaki por kondusí na malesanan manera diabétis, tur sorto di formanan di kanser i malesanan di kurason i vaskular.
Bebementu pisá
Ta bebe aloménos 1 bia pa siman 6 òf mas glas di alkohòl riba 1 dia (hende hòmber), ta bebe aloménos 1 bia pa siman 4 òf mas glas di alkohòl riba 1 dia (hende muhé).
Norma hulandes pa moveshon salú
E norma hulandes ta indiká kuantu moveshon di kurpa mester minimal pa mantenshon i mehorashon di salú. Pa kumpli ku e norma muchanan di 4 te 12 aña mester move aloménos 7 dia pa siman minimal 60 minüt intensivo pa moderá. Hóbennan di 12 te 18 aña mester move pa dia minimal un ora intensivo pa moderá, por ehèmpel kore baiskel. Personanan for di 18 aña mester mester move aloménos 5 dia pa siman minimal mei ora intensivo pa moderá. Pa personanan di 18 te 55 aña ta definí ‘intensivo pa moderá' mas severo ku pa grandinan. Por ehèmpel nan mester kana riba un spit di 5 km pa ora, pa esnan di 55-plùs kanamentu trankil (4 km pa ora) ya ta sufisiente. Ademas, den 2017 Gezondheidsraad a stipulá liñanan di guia nobo pa moveshon.
Sobrepeso
E kriterio mas usá pa sobrepeso ta e body mass index (BMI), definí komo e peso na kilo dividí dor di e kuadrat di e largura. Den kaso di un BMI di 25 òf mas ta papia di sobrepeso, den kaso di un BMI di 30 òf mas ta papia di sobrepeso severo (obesitas). Pa muchanan e límitenan ta dependé di edat i sobrepeso ta dedusí for di 2 aña di edat.