CBS: Habitantenan di Boneiru: ken ta biba unda?
Riba promé di yanüari 2017 Boneiru su poblashon tabata konta 19,2 mil habitante. Di eseinan mas di 7 mil tabata boneriano di nasementu. E sobrá 12 mil tabata prosedente di tur parti, 2,8 mil tabata hulandes oropeo. Esaki ta sali na kla for di datonan di poblashon di CBS tokante Hulanda Karibense.
Kasi 40 porshento di e habitantenan di Boneiru a nase riba e isla. E sobrá 60 porshento ta partikularmente prosedente di èks Antia Hulandes (4 mil), Sur- i Sentroamérika (3,7 mil) i Hulanda Oropeo (2,8 mil). Pa loke ta trata demas èks Antia Hulandes ta trata partikularmente di habitantenan ku a nase na Kòrsou (3,5 mil), un kantidat chikitu ta prosedente di Aruba (0,5 mil).Konsiderando fasilidatnan médiko na Boneiru te ku añanan 90, hopi hende muhé na estado tabata haña yu na Kòrsou, loke por ta un indikashon di e kantidat di habitante di Boneiru nasé na e hermana isla aki (18%).
Rincon ta e bario ku tin mas tantu habitante boneriano (65 porshento). Den Mexico (53 porshento), Amboina (51 porshento) i Nort Saliña (48 porshento) tambe tin hopi boneriano ta biba. Na Lagun Hill, Lima i Sabadeco ta biba solamente un kantidat chikitu di personanan ku a nase na Boneiru.
Hulandesnan oropeo ta biba plamá riba e isla ku konsentrashonnan na Lagun Hill, unda nan ta forma mas di 60 porshento di e poblashon di e bario, i tambe na Lima (54 porshento), Sabadeco (53 porshento) i Santa Barbara (52 porshento). Den sifranan apsoluto mayoria hulandes oropeo (300) ta biba den Nikiboko, sinembargo einan nan tabata forma solamente 10 porshento di e poblashon di bario.
Esnan ku kaba yega ta oropeonan relativamente hóben
Playa Pariba, Playa Pabou, den sentro di Kralendijk i Nikiboko ta e barionan unda hopi hulandes oropeo ku kaba di yega ta establesé nan mes. Esnan ku kaba di yegá no ta establesé nan mes dje tantu ei den e bario di Sabadeco. Esnan ku kaba di yega nan edat promedio ta 32 aña.
Mas tantu personanan di kuarenta i sinkuenta aña ta muda pa Boneiru, bou di personanan ku kaba di yegá apénas tin penshonado. Di esnan ku a establesé nan mes resien riba e isla, mas di un tersera parti ta biba sin partner, algu ménos ku un tersera parti ta biba ku partner i sin yu. Ora ku si tin yu ku tambe ta muda huntu, mayoria bes ta trata di muchanan bou di 15 aña.
Lenknan relevante:
Maatwerk: Bonaire, bevolkingscijfers per buurt