CBS: Resultado negativo pa turismo na Hulanda Karibense den 2017
E kantidat di turistanan ku a drenta tantu na Sint Eustatius i Saba komo na Boneiru a baha den 2017 ku respektivamente 5, 9 i 5 porshento. Sint Eustatius i Saba a konosé un bon aña turístiko den e promé ocho lunanan. Sin embargo esaki a keda anulá dor di pasada di orkan Irma. Na Boneiru problemanan operashonal serka un di e kompanianan di aviashon regional tabata posiblemente e motibu ku e kantidat di turistanan ku a drenta den 2017 tabata mas abou ku den 2016.
Boneiru
Den 2017, 128,5 mil turista a bin Boneiru ku avion, 5 porshento ménos ku den 2016. Problemanan operashonal di un di e kompanianan di aviashon regional probablemente tabata e orígen di esakinan. Mayoria turista tabatin nashonalidat hulandes òf merikano. Turismo krusero na Boneiru a krese si, te asta ku 88 porshento te na 407 mil pasahero. Boneiru a traha duru pa atraé mas krusero pa e isla. Banda di esei e kantidat di pasaheronan krusero den e área karibense a oumentá den su totalidat.
Sint Eustatius
E promé ocho lunanan di 2017 a kana bon pa turismo na Sint Eustatius. E kantidat di turistanan ku a drenta a krese ku 10 porshento kompará ku e mes periodo den 2016. E kresementu aki sinembargo a keda kompletamente anulá dor di binida di orkan Irma na sèptèmber loke a pone ku hopi turista a keda sin bin. Novèmber i desèmber a mustra algu di rekuperashon si. Finalmente e kantidat di turistanan ku a bai Sint Eustatius ku avion den 2017 a resultá 5 porshento mas abou ku den 2016: esaki ta nifiká 10,5 mil turista ku a drenta den 2017. Mester tene kuenta ku e sifranan ta inkluí tambe e turismo di negoshi. Esaki ta nifiká ku ta konta ámtenarnan di gobièrnu hulandes i dunadónan di asistensia, ku no ta biba na Sint Eustatius, tambe komo turistanan ku ta drenta. No a surgi kambionan grandi den 2017 ora ta trata di nashonalidat di e turistanan.
Saba
Meskos ku na Sint Eustatius, e promé ocho lunanan a kana bon pa turismo na Saba: 5 porshento mas turista ku a yega ku avion kompará ku e mes periodo den 2016. E kresementu aki sinembargo a keda anulá pa motibu di binida di orkan Irma. No opstante un rekuperashon leve den novèmber i desèmber, e kantidat di turistanan ku avion den 2017 a resultá alrededor di 9 porshento mas abou ku den 2016: esaki ta nifiká 8,4 mil turista ku a drenta den 2017 (inkluso biaheronan di negoshi). Na Saba tambe no tabatin kambionan supstansial den e porsentahe di nashonalidat di turistanan ku a yega ku avion.
E kantidat di pasaheronan ku a bin Saba ku fèri òf ku yate, a oumentá den 2017 ku 3 porshento. Partikularmente den desèmber hopi pasahero a bin ku barku òf fèri.
Fuentenan
Toerisme in Caribisch Nederland in 2017 in de min
Toerisme Caribisch Nederland 2012-2014