Partnernan di kadena di estranhero ta tene mini konferensia na Saba
Riba djárason 28 di novèmber e partnernan di kadena den maneho di estranhero a bini huntu na Saba pa un mini konferensia anual. Ta promé biaha ku e mini konferensia aki ta tuma lugá na Saba. Promé ku esaki tabatin un reunion speshal pa partnernan di kadena di Saba i Sint Eustatius. Esaki a tuma lugá riba 27 di novèmber último.
Mas ku 45 persona di Saba, Sint Eustatius, Boneiru i Hulanda a partisipá na e enkuentronan di dos dia aki. Gezaghèber di Saba, Jonathan Johnson i Michiel Marchand di Kuerpo Polisial Hulanda Karibense, a habri e konferensia.
Ta organisá e reunion di partnernan di kadena di estranhero kuater biaha pa aña na sea Saba, Sint Eustatius òf Boneiru. Partisipantenan di entre otro Koninklijke Marechaussee (KMar), Kuerpo Polisial Hulanda Karibense (KPCN), servisio di Imigrashon i Naturalisashon (IND CN), Servisio di Asuntu Sosial i di Labor (SZW), Registro Sivil, Voogdijraad, Belastingdienst Caribisch Nederland (BCN) i gabinete di gezaghèber a partisipá na e enkuentro.
E aña aki a klousurá e reunion di partnernan di kadena di estranhero ku un mini konferensia entre e diferente partnernan kaminda a papia riba vários tema. Na final a hasi palabrashon di trabou ku representantenan di IND CN, KMar i KPCN a firma den un kombenio. Tópikonan ku a trata ta entre otro: puntonan di atenshon pa loke ta trata e personanan ku a evakuá despues di orkan Irma i Maria, reforsá e koperashon entre e islanan, protekshon di mucha durante situashon di emergensia den e parti Karibense di Reino, puntonan di atenshon ku e diferente servisionan a topa kuné i kiko mester hasi den futuro pa mehorá esaki.
Durante di e reunion di partnernan di kadena ku a tuma lugá djamars 27 di novèmber a evaluá e lei ‘ Wet Toelating en Uitzetting (WTU-BES)’ i a papia riba adaptashon di e lei i areglo. Aki a wak entre otro e proseso di vigilansia di frontera, seramentu di estranhero i regreso di e estranhero pa pais di orígen.