Desigualdat di entrada na Saba esun di mas abou den Hulanda Karibense
Di tur e islanan BES, Saba a konosé e desigualdat di mas ménos den 2016. E entradanan na Sint Eustatius tabata diferensiá mas. Boneiru a tuma un posishon intermedio. Esaki CBS ta anunsiá.
E desigualdat den e entrada standarisá disponibel, e entrada koregí pa tamaño i konstelashon di e kas di famia, na Boneiru desde 2011 ta kasi stabil.
E koefisiente di Gini tabatin di 2014 te ku 2016 un balor di 0,40. Den e añanan previo esei tabata 0,39. Na Saba ta midi desde 2012 e desigualdat di mas abou di Hulanda Karibense (0,37 den 2016). Sint Eustatius a konosé e diferensianan di mas grandi den entrada standarisá disponibel entre kas di famia. E koefisiente di Gini a subi di 0,41 den 2014 na 0,44 den 2016. E koefisiente di Gini pa Hulanda Oropeo a baha entre 2014 i 2016 di 0,3 na 0,29.
E koefisiente di Gini ta mundialmente e norma mas apliká pa desigualdat di entrada. E balor ta entre 0 i 1, kaminda 0 ta korespondé ku igualdat total (kada kas di famia tin e mes entrada) i 1 ku desigualdat total (un kas di famia ta disponé tur entrada).
Desigualdat di entrada segun e Relashon 80/20
Segun e Relashon 80/20, ku ta reflehá e relashon entre e suma di entrada di e 20 porshentonan di mas haltu i e 20 porshentonan di mas abou, ku un balor di 7,86 Saba a konosé den 2016 tambe e desigualdat den entrada di mas abou.Pa Sint Eustatius a midi e balor mas haltu (13,51) i Boneiru a tuma un posishon intermedio (9,49).
Repartishon di entrada na Boneiru
Den 2016 e kasnan di famia na Boneiru tabatin promedio 27,4 mi dòler pa gasta. E entrada standarisá a suma 22,6 mil dòler. E entrada mediano ta ku 18,5 mil dòler mas abou ku e entrada promedio.
Un entrada entre 10 i 15 mil dòler ta mas komun. Kasi 20 porshento di e kasnan di famia ta kai den e kategoria akí. For di e grupo aki kasi 4 di kada 5 kas di famia tabatin partikularmente entrada for di trabou i mas di 1 di kada 5 tabata partikularmente dependiente di un yudansa finansiero di gobièrnu.
Un entrada entre 15 i 20 mil dòler a surgi kasi mes tantu bes ku un entrada entre 10 i 15 mil dòler. Di e grupo ku un entrada entre 0 i 5 mil dòler mitar tabatin partikularmente entrada for di trabou i e otro mitar partikularmente entrada for di un yudansa finansiero di gobièrnu.
Pa Sint Eustatius i Saba tin muchu tiki dato disponibel pa presentá un figura semehante.
Definishonnan
E entrada disponibel di e kas di famia
E entrada bruto for di labor, propio empresa, kapital privá, benefishi sosial i transferensia risibí, kitando afó transferensia di entrada pagá, prima di seguro di trahadó, prima di seguro di kuido i kobransa di impuesto i kapital privá.
Entrada standarisá disponibel di e kas di famia
E entrada disponibel di un kas di famia koregí pa diferensia den grandura i konstelashon di e kas di famia. Ku ayudo di e eskala di ekivalensia di OECD ta redusí tur e entrada di un kas di famia na un kas di famia di un persona. Di e forma akí ta hasi e nivelnan di prosperidat di e kasnan di famia komparabel ku otro. E entrada standarisá pues ta un norma tambe pa prosperidat di (e miembronan) di un kas di famia.
fuente:
CBS - Caribisch NL; inkomensongelijkheid bij particuliere huishoudens
CBS - Welvaart van particuliere huishoudens; kerncijfers