Prima pa dunadó di trabou na Hulanda Karibense ta baha entrante promé di yanüari 2019
A publiká e primanan nobo pa dunadó di trabou den ‘Staatscourant’. Ministerio di Asuntunan Sosial i di Labor (SZW) ta baha e primanan di 18,4% pa 13,4% entrante promé di yanüari 2019. Di e manera aki e salarionan por subi i forsa di kompra ta oumentá.
Dor di redukshon struktural di prima di dunadó di trabou, e dunadó di trabou por subi salario, sin ku gastu salarial ta subi. E espasio finansiero ku esaki ta krea, ta varia pa kada situashon i ta entre 3.4 i 4.4%, dependiendo si e dunadó di trabou ta paga prima di penshun. Ta e intenshon pa dunadónan di trabou inkluí e espasio aki por kompleto den kalkulashon di salario di nan empleadonan.
Subida suèldu mínimo
E Salario Mínimo Legal (‘Wettelijk Minimum Loon’,WML) ta subi ku 5% entrante promé di yanüari 2019 riba e korekshon di inflashon. Entrante promé di yanüari 2019 dunadónan di trabou pues ta legalmente obligá pa paga trahadó ku na e momentu aki tin un salario mínimo, 5% mas. E pago di ònderstant, AWW i AOV seguidamente ta subi na mes momentu ku e salario mínimo. Ministerio di SZW lo anunsiá e sumanan eksakto durante luna di novèmber.