Tayer tokante di akohida di mucha na Hulanda Karibense
E ministerionan di Asuntunan Sosial i Labor, di Salubridat Públiko i di Enseñansa, Kultura i Siensia, huntu ku e Entidatnan Públiko di Saba, Sint Eustatius i Boneiru, ta organisá tayer di tres dia tokante akohida di mucha despues di skol na Hulanda Karibense.
E evento “BES(t) 4 kids”, ta tuma lugá for di 9 te ku 11 di òktober na Mike van Putten Youth Centre na Sint Eustatius. Ámtenarnan di e Entidatnan Públiko Saba, Sint Eustatius i Boneiru lo partisipá na e tayer di tres dia akí.
E enkuentro akí ta un kontinuashon riba e promé seshon di trabou ku a tuma lugá na Boneiru den yüni di 2018. Meta ta pa yega na un plan di enfoke konhunto pa e añanan benidero.
Durante di e enkuentro den yüni a investigá unda i kon e Entidatnan Públiko i e ministerionan por traha huntu. Tambe a pone a promé pasonan na kaminda pa un plan di enfoke konhunto di vários aña. E partisipantenan di e enkuentro na Mike van Putten Youth Centre lo hasi pasonan di kontinuashon, pa asina por tuma un desishon atministrativo pa fin di e aña akí. Durante di e tayer di tres dia akí nan lo trata entre otro mehorashon di e kalidat di akohida, supervishon i akseso na e finansa nan.
A kuminsá ku reunionnan ku e direktivanan di akohida pa mucha, akohida despues di skol i institutonan di enseñansa, pa skucha kiko ta pensa di e plannan.