H. Francees ta baha ku penshun despues di 42 aña di servisio
Señor Francis H. Francees, hefe di departamento de prevenshon, a tuma despedida di kuerpo di Bombero di Hulanda Karibense despues di 42 aña di servisio. Durante su último dia de trabou, 31 julie 2018, famia, amigu i koleganan a reuní pa tuma despedida di señor Francees.
Durante e resepshon, vários kolega i amigu a duna un diskurso. Komandante general remplasante Jan Janga a duna di konosé ku señor Francees semper tabata para kla pa yuda i a invertí hopi den kuerpo di bombero pa asina trese kambionan positivo.Tambe el a duna di konosé ku señor Francees a kuminsá su karera komo bombero aspirante i ku trabou duru i perseveransia a bira hefe di bombero. Durante di e último 20 añanan señor Francees a laborá komo hefe remplasante di departamento di prevenshon i tambe komandante suplente.
Señor Francees tambe a ehersé vários trabou di konseho riba tereno preventivo na Saba i Sint Eustatius. Den su diskurso di despedida, señor Francees a konsehá e generashon nobo di bomberonan pa mantené integridat na haltu. Segun Francees integridat ta un di e basenan fundamental pa ta un bon bombero.
BKCN ta gradisí señor F.H. Francees pa su 42 añanan di servisio i ta dese’é hopi suerte ku su penshun bon meresí.