Resúmen di reunion general di 13 di sèptèmber 2018 den Tweede Kamer

Notisia | 13-09-2018 | 20:42

E miembronan di Parlamento a papia tokante e pobresa grandi ku tin na Boneiru, Saba i Sint Eustatius i kiko Gabinete por hasi na esaki.  E  Parlamentario di D66 Antje Diertens ta tuma nota ku Gabinete ta tuma e promé pasonan pa atendé ku pobresa. Ku esaki e ta kontentu, pero tin hopi mas pa hasi. Stieneke van der Graaf di ChristenUnie ta haña hopi importante pa bini ku un aserkamentu urgente pasobra algun persona tin tres trabou i asta asina nan entrada no ta sufisiente. E ta kontentu si ku Gabinete tòg ta tuma paso.

Parlamentarionan di SP i GroenLinks ta haña ku e medidanan no ta sufisiente i ku ta awor mester fiha un mínimo sosial.
Sekretario di Estado Knops a indiká ku e ta sinti su mes responsabel pa e totalidat pa duna sosten na abitantenan i gobièrnu di e islanan. “Mi ta hopi kontentu ku a tuma e promé pasonan aki i ku tin perspektiva atrobe”.  Ela enfatisá ku tin hopi trabou pa hasi pa Gabinete pero tambe gobièrnunan di e islanan. Ku gobièrnu di Boneiru Knops ke sera un akuerdo.   

Tambe Sekretario di Estado di Asuntunan Sosial van Ark a enfatisá ku pa e ta trata di mehorashon pa e hendenan di Boneiru, Sint Eustatius i Saba. “Nos ke hasi loke ta nesesario a korto i largo plaso.” Den un karta algun luna pasá ela anunsiá medidanan konkreto. Entretantu ela sigui traha riba plannan pa término largu i na  2020 lo tin un evaluashon pa wak kiko mas lo mester hasi.

Pa menta un suma pa un mínimo sosial, segun Van Ark, no ta posibel. E entradanan ta muchu abou i e gastunan ta muchu haltu, pues na ámbos banda mester hasi algu. Hür di kas ta varia enormemente, pues no tin un sifra ku por indiká kiko hende ta paga. “E kos di mas importante pa ami ta ku e situashon individual di e hendenan ta drecha.”

E dos Sekretarionan di Estado a palabrá ku e miembronan di Parlamento ta informá nan anualmente promé ku reseso di verano tokante di e progreso. 
E pasonan konkreto ku nan anunsiá ta lo siguiente:

• Nos ta subi ònderstant pa asina hendenan ku tin esaki i ku ta biba riba nan mes, entrante promé di yanüari 2019 ta yega na mínimo 55% di e WML (salario mínimo stipulá pa lei).
• Nos ta subi kompensashon pa yu ku 50% entrante promé di yanüari, 2019.
• Nos lo introdusí un kompensashon pa hendenan ku tin un AOV ku ta biba riba nan mes, posiblemente entrante promé di yanüari 2020.
• Nos ta subi e kompensashon di ònderstant pa esunnan ku ta kompletamente i permanentemente inkapasitá, posiblemente entrante promé di yanüari 2020.
• Nos ta subi e límite di entrada pa ònderstant partikular temporalmente na 120% di e salario mínimo stipulá pa lei. 
• Nos ta yuda ku mehorashon di e kalidat i akseso di akohida pa mucha.
• Nos lo duna un impulso na bibienda sosial na e islanan dor di introdukshon di un forma di supsidio di hür.
• Nos lo pone supsidio disponibel pa garantisá akseso na suministro di awa di bebe. Tambe pa loke ta trata suministro di koriente ta preparando adaptashon di lei.
• Nos lo revisá lei i reglanan di telekomunikashon pa redusí gastunan.
• Nos lo hasi esfuersonan pa stimulá pa hendenan kuminsá nan propio empresa i sektor di turismo.
• Nos ta sostené e entidatnan públiko pa fortalesé mediashon pa labor.