Kolaborashon entre OLB-ZVK-BIA ta hasi Boneiru hopi mas aksesibel pa ròlstul
Ku introdukshon di e asina yama ‘Passenger Boarding Ramp’ na Flamingo International Airport, Boneiru a bira hopi mas aksesibel pa ròlstul. E ‘Passenger Boarding Ramp’ ta un instalashon movibel ku kua pasaheronan den un ròlstul por subi i baha avion mas fásil.
En konekshon ku e konferensia ‘Toegankelijk Toerisme Bonaire’, ku e grupo di trabou ‘Fysieke Toegankelijkheid Bonaire’ di e tempu ei a tene riba 18 di òktober 2013, riba inisiativa di BIA i e partnernan den e grupo di trabou a lobby pa fásilita un fasilidat asina pa Boneiru. E partnernan den grupo di trabou ta MiVaBo, FKBO, Fundashon Mariadal i e Direktorado di Komunidat i Kuido.
Den 2017 kosnan a bin kuminsá kana mas lihé despues ku Entidat Públiko Boneiru (OLB), Representashon di Reino i e Ofisina di Kuido (ZVK) a bini huntu pa konsiderá e diferente posibilidatnan. A yega na finansiamentu di e instalashon aki dor di empuhe konhunto di ZVK, OLB i Flamingo International Airport.