Salario mínimo i pagonan ta subi ku 5% na Hulanda Karibense na kambio di aña

Hopi abitante di Boneiru, Sint Eustatius i Saba tin difikultat pa yega fin di luna ku nan entrada aktual.  Gobièrnu Hulandes ta konsiente di esaki i a anunsiá den luna di yüni di e aña aki algun medida pa drecha e situashon.

Awe ta dal un paso mas signifikante:  e primanan di dunadó di trabou na Hulanda Karibense ta baha ku mas ku un kuart. Esaki ta hasi posibel pa subi suèldu mínimo  i pagonan manera ònderstant ku 5 porshento, esaki ta banda di  inflashon.  Esaki gobièrnu Hulandes a anunsiá riba Prinsjesdag  (apertura ofisial di aña Parlamentario).

“Ta sumamente importante pa hendenan tin mas sèn, pasobra e gastunan di kuminda, ko’i bebe i bibienda ta haltu.  Na mes momentu mi ke sòru pa semper un trabou ta generá mas entrada ku ònderstant.”,  segun Sekretario di Estado Tamara van Ark di Asuntunan Sosial i di  Labor . Dor di un bahada di e prima di dunadó di trabou di 18,4 pa 13,4  porshento, labor ta bira mas barata. Dor di esaki e suèldu mínimo ta subi. E pagonan di ònderstant, AWW i AOV tambe ta subi di mes un manera ku e salario mínimo.

E medida aki ta kontinuashon di e promé pasonan ku a keda anunsiá e aña aki den luna di yüni.  Di e forma aki Gabinete Hulandes ta sòru pa e gruponan vulnerabel manera  penshonadonan ku ta biba riba nan mes, personanan ku ta kompletamente i permanentemente desabilitá i mayornan (soltero) ku yu  ta sinti un adelanto.  E ònderstant pa hendenan ku ta biba riba nan mes ta subi por ehèmpel entrante promé di yanüari 2019. Banda di esei for di e fecha aki mas hende por bini na remarke pa asistensia partikular pasobra Gabinete Hulandes ta subi e nivel di entrada na 120 porshento di e suèldu mínimo. Tambe kompensashon pa yu ta subi ku 50 porshento entrante 2019. 

Gabinete Hulandes tambe lo introdusí un pago adishonal pa hendenan inkapasitá ku ta biba riba nan mes . Si ta posibel lo introdusí esaki entrante promé di yanüari 2020. Riba e mes un fecha Gabinete lo subi e ònderstant pa hendenan ku ta kompletamente i permanentemente inkapasitá pa traha. 

Sekretario di Estado di Asuntunan Interno i Relashonnan den Reino, Raymond  Knops i Sekretario di Estado Van Ark lo informá Tweede Kamer anualmente promé ku reseso di verano tokante e adelanto di e akshonnan tumá. Na 2020 Gabinete Hulandes lo wak e efekto ku e medidanan a duna i lo disidí si ta nesesario tuma medidanan adishonal.