Konferensia aserkamentu trafikashon ilegal di hende

Ministerio di Hustisia i Siguridat e dianan akí ta tene na Boneiru un konferensia tokante trafikashon ilegal i kontrabanda di hende. E konferensia di tres dia a kuminsá riba 18 di sèptèmber i ta destiná pa ekspertonan di diferente servisio-/instansianan di Hulanda Karibense, Kòrsou, Sint Maarten, Aruba i Hulanda.

Potret di grupo aserkamentu trafikashon ilegal i kontrabanda di hende na Hulanda Karibense

Desaroyo i mantenshon di bon suministro di informashon ta krusial pa e aserkamentu di trafikashon ilegal i kontrabanda di hende. Pa e motibu ei a krea un Registro di Tema, ku ta na disposishon tambe di e otro paisnan. Den e registro ta kompilá i analisá tur dato relevante ku e meta pa efektivamente atendé, kombatí i prevení trafikashon ilegal i kontrabanda di hende. Dia 1 ta den kuadro di traspaso di konosementu pa desaroyo i mantenshon di un Registro di Tema di Trafikashon Ilegal i Kontrabanda di hende pa kua na yüni 2017 a firma un kombenio na Hulanda Karibense. E registro ta finalisá awor i por bai hasi uso di dje. Por registrá notifikashon- i siñalnan di trafikashon ilegal i kontrabanda di hende den e registro. Servisionan ku ta partisipá na e training ta entre otro polis, Koninklijke Marechaussee, ministerio públiko, servisio di imigrashon, inspekshon di labor, entidatnan públiko, Wardakosta i RST.

Dia 2 ta enfoká riba interkambio di eksperensia tokante prevenshon i aserkamentu di trafikashon ilegal i kontrabanda di hende den i entre e paisnan di Reino. E paisnan pa esaki a sera un Memorandum of Understanding (MoU) na 2015. Riba dia 3, e último dia, ta turno na ekspertonan di Merka (EU). Nan lo profundisá riba detekshon di trafikashon ilegal i kontrabanda di hende. Partikularmente lo duna atenshon na investigashon finansiero i aserkamentu di víktimanan den e proseso di detekshon. Den un MoU di 2016 tin e palabrashonnan di kooperashon entre Reino i Merka.

Meta di e konferensia ta pa sigui promové un mihó kooperashon pa atendé prevenshon i kombatimentu di trafikashon ilegal i kontrabanda di hende di forma efektivo.

Trafikashon ilegal i kontrabanda di hende ta un delitu pisá ku mester atendé fuerte.Trafikashon di hende ta eksplotashon di hende bou di preshon i ta ser kalifiká komo un forma moderno di sklabitut den konteksto internashonal. E sektornan mas importante unda eksplotashon ta tuma lugá ta horeka, konstrukshon, prostitushon i ayudo doméstiko.Kontrabanda di hende ta transporte ilegal di hende pa un otro pais.