Produkto bruto interno (Bbp) ta mas haltu na Boneiru, mas abou na Sint Eustatius i Saba
Den 2016 e volúmen di e produkto bruto interno (Bruto binnenlands product, Bbp) a subi ku 2,2 porshento na Boneiru. Na Sint Eustatius i Saba e volúmen di e bbp a baha ku respektivamente 1,0 porshento i 0,5 porshento. Por lo general e volúmen di e bbp di Hulanda Karibense a subi ku 1,4 porshento. Esaki CBS ta anunsiá a base di sifranan nobo.
E kambio di volúmen di bbp ta e desaroyo di e balor di e bbp koregí pa kambionan di preis. Pa korekshon di preis a hasi uso di e índise di preis di konsumidó.
E balor di e bbp di Hulanda Karibense tabata den 2016, 582 mion US dollar, 3,2 porshento mas haltu ku den 2015. E bbp di Boneiru a subi ku 4,6 porshento na 434 mion dòler merikano den 2016. E bbp di Sint Eustatius a baha ku 2,1 porshento na 100 mion dòler merikano. Na Saba e bbp a subi ku 2,6 porshento na 48 mion dòler merikano.
E Bbp pa kabes di poblashon di mas haltu ta na Sint Eustatius
E bbp pa kabes di poblashon den 2016 tabata na Sint Eustatius esun di mas haltu, 26.100 dòler merikano. Na Saba e bbp pa kabes tabata 24.200 dòler merikano i na Boneiru 22.500 dòler merikano. For di 2012 CBS ta midi e bbp di Hulanda Karibense. Kompará ku 2012 e bbp pa kabes di poblashon den 2016 a subi na Boneiru (2,7 porshento) i Saba (13,1 porshento), pero a baha leve na Sint Eustatius (0,8 porshento).
Fuentenan:
Statline: Caribisch Nederland; bruto binnenlands product (bbp) - NL
Splikashon:
Kambio di volúmen - NL