Dia di Profeshonalnan ku ta traha ku hubentut na Boneiru
Siman pasá djabièrnè, 14 di sèptèmber, Jeugdzorg en Gezinsvoogdij Caribisch Nederland (JGCN) a organisá un dia eksitoso pa profeshonal ku ta traha ku hubentut di diferente organisashon ku ta aktivo den e kadena di ayudo pa hubentut.
Despues di un promé enkuentro eksitoso na Isla riba, na Boneiru tambe a selebrá Dia di Profeshonal ku ta traha ku hubentut meskos ku ta e kaso na Hulanda. Riba inisiativa di un kolaboradó di JGCN i e partnernan di kadena, e aña aki a pone enfoke riba e profeshonalnan ku ta laborá den e kadena di ayudo hubenil.
A skohe e mes un tema ku esun di Hulanda, esta: ‘Kolaborashon Lokal’, kaminda e identidat i fihamentu di posishon di e profeshonal ku ta traha ku hubentut ta pará sentral. Pero prinsipalmente a trata kolaborashon mutuo. Representantenan di entre otro Voogdijraad, Directie Samenleving en Zorg, Mental Health Caribbean (MHC), Veiligheidshuis, Stichting Jong Bonaire, Stichting Rosa di Sharon, Sentro Hubentut i Famia (CJG), Expertise Onderwijs Zorg (EOZ) i skolnan, entre otro, tabata presente. Huntu ku JGCN nan a fiha nan mes riba desaroyonan pa bienestar di e muchanan i famianan na Boneiru, manera profeshonalidat, embolbimentu i aksesibilidat.
Durante di e charla “Fihamentu di posishon i kon pa atendé ku otro hende”, a para ketu na e desaroyo di e profeshonalnan ku ta traha ku hubentut. Esaki a kontribuí na mehorashon di e servisio duná dor di profeshonalnan ku ta traha den e kadena di ayudo hubenil.
Despues di e tayernan ku a organisá na Isla riba, na Boneiru tambe a organisá un tayer. Esaki su enfoke tabata riba e ròl ku kada organisashon ta hunga den e kadena di ayudo hubenil.
Meta di e tayer tabata pa trese e ayudo mas mihó posibel dilanti. Aki e enfoke tabata riba koloborashon lokal, kaminda e hóben ta sentral. Pa e tayer a hasi uso di un modelo di dedikashon (toewijdingsmodel), diseñá dor di un di e partisipantenan di e ‘Talent Ontwikkel Programma” (TOP), (programa di desaroyo pa talento). Pa medio di e ‘modelo di dedikashon’, e ròlnan, embolbimentu i konekshon di e profeshonal ku ta traha ku hubentut a bira mas kla/komprendibel i esaki a kondusí na komprendementu i kolaborashon individual mas fuerte.
Lo uza e resultadonan di e tayernan pa yega na un mihó kolaborashon, ku e interesnan pa ku e mucha na promé lugá. Di e manera aki JGCN ta aspirá pa un ayudo pa hóben mas mihó posibel pa e muchanan na Boneiru, Sint Eustatius i Saba.