Status di Dia di Rincon
Durante e reunion di Konseho Insular di 16 di yanüari último a hasi pregunta tokante Dia di Rincon. For di 2014 tin un diskushon andando tokante hasi Dia di Rincon un dia ofisial liber si òf no na Boneiru. E tópiko aki ta parti di e diálogo sosial Boneiru kaminda representantenan di dunadó di trabou, representantenan di trahadó i Entidat Públiko Boneiru ta partisipá den dje.
Na 2014 e Ministerio di Labor i di Asuntunan Sosial (SZW) i e Ministerio di Asuntunan Interno i Relashonnan den Reino (BZK) a tuma kontakto ku Kolegio Ehekutivo di Boneiru tokante e status di Dia di Rincon. E último karta di e Ministerio di SZW na Kolegio Ehekutivo riba e tópiko aki ta fechá 17 di òktober 2017. Aki e Sekretario di Estado di SZW ta indiká ku riba e status di Dia di Rincon ainda no tin klaridat. Pa loke ta trata deklará e dia aki komo dia ofisial liber e desishon di esaki ta primeramente serka Kolegio Ehekutivo.
Posibel solushonnan
Durante kombersashonnan Kolegio Ehekutivo a indiká ku nan ke kambia un dia liber ofisial eksistente pa asina Dia di Rincon bira dia ofisial liber. E dia ku ta bini na remarke pa esaki lo por ta e djaluna despues di gran marcha di karnaval. Un desishon den esaki di parti Kolegio Ehekutivo lo krea klaridat.
Un opshon ku ta bai mas leu ainda ta pa agregá un dia èkstra liber pa medio di un òrdu atministrativo general (algemene maatregel van bestuur). Esaki ta un prosedura mas pisá ku tin un lapso di tempu mas largu ku solamente por implementá si tin sosten amplio pa esaki tambe di parti di dunadó di trabou i trahadónan.