Preisnan a subi fuerte na Saba
Den e di kuater kuartal di 2017 e preisnan di konsumidó tabata 2,5 porshento mas haltu na Saba kompará ku un aña anterior. Kuartal pasá ainda e konsumidónan na Saba tabata paga 1,3 porshento ménos pa merkansia- i servisio ku un aña anterior. Na Sint Eustatius e preisnan riba base anual a subi ku 1,8 porshento i na Bonaire ku 1,2 porshento. Asina CBS ta duna di konosé.
Desde e di kuater kuartal di 2016 preisnan a baha na Saba kompará ku un aña anterior. Na esei a yega un fin, despues di paso di orkan Irma na sèptèmber 2017. Hopi merkansia i servisio a bira mas karu den e di kuater kuartal di 2017, partikularmente komestibel. Fruta fresku na e momentunan akí ta kasi 25 porshento mas karu ku un aña anterior i keshi mas di 14 porshento. Ademas material di konstrukshon a bira mas karu i preisnan den hóreka a subi.
No ta tur kos a bira mas karu na Saba. Por ehèmpel preis di webu a baha ku mas di 30 porshento aña pasá. Tambe preis di gasolin a baha loke a redusí e subida di preis total den kuartal pasá.
Preisnan di konsumidó na Sint Eustatius 1,8 porshento mas haltu
Na Sint Eustatius kasnan di famia a paga kuartal pasá 1,8 porshento mas pa merkansia i servisio ku un aña anterior. Kontrali na Saba e preisnan na Sint Eustatius den henter 2017 tabata mas haltu ku den 2016: den e di tres kuartal ainda 2,1 porshento mas haltu ku un aña anterior. Promedio e preisnan di komestibel a subi un tiki ménos fuerte ku kuartal pasá. Tòg partikularmente batata i webu awor ta konsiderablemente mas karu ku un aña anterior.
Gasolin mas karu na Boneiru
Na Boneiru e preisnan di konsumidó kuartal pasá tabata 1,2 porshento mas haltu ku un aña anterior. Den e di tres kuartal ainda esaki tabata 0,6 porshento. E subida mas haltu di preisnan den e di kuater kuartal ta ser partikularmente okashoná pa e desaroyo di preis di gasolin i elektrisidat. Gasolin aktualmente ta un promedio di kasi 12 porshento mas karu ku un aña pasá. Elektrisidat al kontrario a baha den preis un aña pasá. Un aña largu esaki tabatin un dèmpel riba desaroyo di preis i awor e no tin e efekto ei mas.
Desaroyo di preis 2017 promedio
Na 2017 e nivel di preis di konsumidó promedio na Sint Eustatius tabata 1,9 porshento mas haltu ku na 2016. Na Saba, no opstante subidanan di preis último kuartal, e preisnan promedio di merkansia i servisio tabata kasi riba mes nivel ku den 2016. Na Boneiru tambe e nivel di preis no a kambia muchu. Aki e preisnan a subi den 2017 ku 0,5 porshento promedio.
| Esaki ta e último publikashon ku e índise di preis di konsumidó 2010=100. Desde e promé kuartal di 2018 CBS ta publiká e índise di preis di konsumidó 2017=100 pa Hulanda Karibense. Esaki tin konsekuensia pa uso di e índise. Ora di publikashon tokante e promé kuartal di 2018 CBS lo splika kiko e kambio aki ta enserá i kon por usa e índise nobo. |
Sifranan tentativo
E sifranan tokante e di kuater kuartal di 2017 i tokante aña 2017 ta tentativo i lo ser stipulá definitivamente ora di publikashon tokante e promé kuartal di 2018.
Fuente: StatLine: Caribisch Nederland