Gabinete ta invertí na Hulanda Karibense
Gabinete ta pone 30 mion euro disponibel pa invertí den Boneiru, Saba i Sint Eustatius. Gabinete a asigná prioridat na mehorashon di perspektiva ekonómiko den Hulanda Karibense dor di mehora infrastruktura i redusí pobresa. Esaki Minister Schouten a duna di konosé awe pa medio di un karta na nòmber di Minister Ollongren (BZK) i Sekretario di Estado Knops (BZK) na Tweede Kamer.
Den e akuerdo di gobernashon a palabrá ku e invershonnan ta destiná pa fortalesé e regionnan. A determiná seis region: Hulanda Karibense ta un di e regionnan. Awe gabinete a disidí ku ta pone 30 mion euro disponibel pa e siguiente proyektonan:
- renobashon i konstrukshon di e haf di Saba;
- desaroyo di agrikultura na Saba;
- kontribushon na e suministro di kombustibel duradero na Boneiru;
- stimulá bibienda sosial na Boneiru;
- desaroyo di planifikashon pa desaroyo di agrikultura, mehorashon di matadero na Boneiru;
- desaroyo di planifikashon i stimulá pa medio di un ‘job center’ na Boneiru;
- mehora e konekshon entre edukashon i merkado laboral;
- i kombatí e problema di eroshon na Sint Eustatius.
Manera a informá anteriormente, lo ehekutá e invershonnan na momentu ku por konstatá ku tin bon gobernashon i un maneho finansiero sólido. Sekretario di Estado Knops ta den kombersashon ku kolegio ehekutivo Boneiru tokante di e mehorashonnan nesesario i e manera kon e por yuda den esaki. Sekretario di Estado ke yega na un akuerdo di gobernashon ku Entidat Públiko Boneiru den kual lo trata temanan di prioridat i kaminda lo duna un yenamentu konkreto di bon gobernashon. Lo kuminsá hasi uso di e rekursonan pa e proyektonan di Boneiru manera ku e akuerdo di gobernashon aki tei, tin palabrashonnan tokante di bon gobernashon i maneho finansiero i realisá e plannan di maneho pa e proyektonan.