Inspektor Hodge Hefe nobo di Kuido Polisial Básiko na Statia
Inspektor Robelto Hodge entrante 1 di yüli 2018 ta e hefe nobo di kuido polisial básiko na Sint Eustatius. Esaki a keda konfirmá djadumingu durante di un seremonia di instalashon speshal.
Tabata presente e management di polis di Hulanda Karibense, kolega- i partnernan den e kadena hudisial, famia i amigunan. Inspektor Hodge ta tuma lugá di Inspektor Maurice van Velzen kende a okupá e posishon akí e último kuater añanan.
Komisario Jose Rosales, hefe di kuerpo polisial pa Saba, Sint Eustatius i Boneiru, a bisa ku e ta sumamente kontentu i orguyoso ku e dia akí a yega i ku inspektor Hodge a demonstrá su mes despues di a finalisá ku éksito e estudio di dos aña komo preparashon pa e responsabilidat akí. Den su diskurso e hefe nobo di kuido polisial básiko a bisa: "Mi ta duna guia na un tim aki na Sint Eustatius. Mi konosé mi tim. Mayoria di e miembronan di e tim na Sint Eustatius ta mucha hòmber- i mucha muhénan di e isla. E tim akí ta stabil i integrá den e komunidat di Statia. E muchanan, ruman hòmber- i muhénan, mayor- i amigunan ku kende nan a lanta, konosé nos i nos konosé nan. Mi ta kompletamente apto pa mantené e konekshon ei entre mi koleganan i mi mes i tambe entre e komunidat i ami, lòs di mi papel komo hefe di kuido polisial básiko. Tin hende ku kisas ta mira esaki komo un reto; ami ta mira esaki komo un bentaha."
Hodge ta un veterano di 28 aña kende a kuminsá su karera den polis na St. Maarten na 1990. El a muda na 1995 pa St. Eustatius. Huntu ku e gran mayoria di e aktual tim a traslad’é na 2010 pa polis di Hulanda Karibense. Su predesesor, inspektor Maurice van Velzen, awor ta guia e unidat di KMar (kontrol di frontera) na Saba i Sint Eustatius.