A tene tayer ‘Duna rèspèt, pa haña rèspèt’ na Sint Eustatius
Riba djárason 13 di yüni, e Ministerio di Hustisia i Seguridat, den kolaborashon ku entidat públiko Sint Eustatius, a tene un tayer di un dia yamá “Duna rèspèt pa haña rèspèt”, ku komo tópikonan violensia doméstiko i abusu seksual di mucha.
E tayer a trese profeshonalnan trahando pa e entidatnan públiko, pa RCN i e ministerionan di Hustisia i Seguridat, di Salubridat Públiko, Bienestar i Deporte i tambe di Asuntunan Interno i Relashonnan den Reino na Den Haag, huntu. Komisario di Gobièrnu, Sr. Marcolino Franco a hiba un spich kaminda ela deklará e tayer habrí ofisialmente.
E metanan prinsipal tabata pa hiba kombersashon tokante di e estado di e trabou, tarea i responsabilidat di e diferente servisionan públiko involukrá den atendé ku violensia doméstiko i abusu seksual di mucha, fortalesé e koperashon i interkambio entre servisionan públiko dor di konektá e inisiativanan aki, i tambe diskutí e instrumento-, struktura- i programanan ku mester atendé e asuntu i pa establesé elementonan di un plan di akshon konkreto.
kompliká
“For di 2017, Sint Eustatius tin su mes Plan di Akshon pa Violensia Doméstiko”, Marcolino Franco a bisa. Nos ke trata esaki komo un plan dinámiko paso violensia doméstiko i abusu seksual di mucha ta tópikonan kompliká pa papia tokante di dje den komunidatnan chikitu. Esaki mayoria biaha ta trese desafionan spesífiko pa e profeshonalnan trahando den e área aki. Na Sint Eustatius nos a yega e fase kaminda nos mester forma ‘partnershipnan’ stratégiko i sigui establesé kontakto entre e diferente ‘stakeholdernan’ lokal i tambe den Reino. Awe tabata promé paso den e bon direkshon. Nos no por duna nos mes e luho di no hasi nada”, segun Marcolino Franco.
Partisipantenan a diskutí tur nivel di violensia doméstiko i abusu seksual di mucha, manera: señalnan di abusu i e kompromiso pa ku servisionan di follow-up; registrashon i interkambio di informashon entre servisionan; proveé sosten i duna asistensia na víktimanan; aplikashon di lei, persekushon i libertat kondishonal pa e malechor, treinen pa profeshonalnan; oumentá prevenshon i konsientisashon i monitor i evaluá.
Satisfecho
“Mi ta satisfecho ku e nivel di kompromiso di ‘stakeholdernan’ riba e islanan i di e ministerionan na Den Haag. Kombiná, tin un gran kantidat di eksperensia i ekspertisio ku por yuda Sint Eustatius pa logra su metanan den kon pa trata ku violensia doméstiko i abusu seksual di mucha. Lo sigui desaroyá e puntonan di akshon i e akuerdonan proponé, manera tabata e meta di e tayer aki.”, segun Gert Bogers, liaison di e ministerio di Hustisia i Seguridat.