Sekretario di estado Blokhuis: “Sigui traha huntu pa mehorá kuido pa tur mucha-, adulto-, i grandinan na Saba”

E aña aki i otro aña Saba lo risibí 76 mil dòlèr adishonal pa kuido públiko, pues en total 152 mil dòlèr. Esaki sekretario di estado Paul Blokhuis (Salubridat Públiko, Bienestar i Deporte (VWS)) a anunsiá durante di su bishita na Saba. Ku esaki Blokhuis ta honra e petishon di Saba pa kontratá  enfermera adishonal pa por ehèmpel kuido di salú pa muchanan.

Sekretario di estado Blokhuis: “Sigui traha huntu pa mehorá kuido pa tur mucha-, adulto-, i grandinan na Saba”
Sekretario di Estado Blokhuis a papia entre otro ku e kordinadó di programa Caroline Teeuwen di Child Focus

“Nos ke fortalesé aún mas e forsa grandi di e komunidat di Saba i entidat públiko”, Blokhuis a bisa. “Saba a eksperensiá un desaroyo stabil den e domèin sosial. Nos lo ke sigui aporta na esaki.” Saba ta bai hasi mas pa evitá ku mucha- i hóbennan ta haña nan den problema, asina a anunsiá tambe awe mainta. “Dor di tuma medidanan trempan ora  kosnan no ta kana bon den un famia i buska un solushon konhuntamente. Pa realisá esaki, lo apuntá dos persona adishonal. E dos añanan ku ta sigui VWS ta duna Saba 125 mil euro pa aña pa esaki”, Blokhuis a bisa. “Pero nos afan ta pa, si kos kana bon, kontinuá ku esaki.”

Hóben- i grandinan
Tambe a anunsiá awe ku Kuido pa Hóben i Bienestar di Famia (JGCN) lo ehekutá e tareanan spesial pa hubentut. A palabrá ku entidat públiko i JGCN ku lo traha intensivamente huntu pa asina pèrkurá pa kada mucha na Saba risibí e kuido ku e meresé i pa no lubidá niun hende. Seguidamente Blokhuis a bisa tambe di ke mehorá e kuido pa grandinan pa personanan ku ta biba na kas. “Nos ta hasi esaki dor di kuminsá otro aña ku invertershon èkstra den ayudo doméstiko, entrega di kuminda, transporte ora mester di esaki, por ehèmpel pa hasi kompra i adaptashon na bibienda. E añanan benidero nos ta bai empeñá nos mes èkstra ku invershonnan pa elevá e kalidat di kuido pa grandinan. Ta bai bin mas yudansa. Nos ta den kombersashonnan tokante di kiko eksaktamente esaki lo nifiká pa e hendenan aki na Saba.

Prevení mas
Segun e sekretario di estado un akuerdo di prevenshon i deporte Karibense mester ta kla na komienso di 2019. VWS i Saba huntu lo bai e lucha kontra di humamentu, obesidat i maluso di alkohòl , “na un manera ku ta kuadra na Hulanda Karibense”, segun Blokhuis. “I nos ta bai hasi mas pa loke ta trata prevenshon i apoyo ora ta trata di embaraso di tiner no intenshonalmente. Esaki tambe tin ku kuadra optimalmente ku loke por usa na Saba.”

Blokhuis a bisa tambe ku ela risibí un bon impreshon di e isla i ku a risibié di un forma hopi plasentero. Ela bisa ta “agradabel pa mira” ku Saba tambe ta un munisipio di JOGG (Jongeren Op Gezond Gewicht, red.). E sekretario di estado a bishitá entre otro e Cruijff Court i a drenta moveshon e tambe dor di ‘un buèlta magnífiko’ riba Mount Scenery.

“Pa konkluí, mi ke para ketu ainda na e investigashon di poblashon Hulanda Karibense”, Blokhuis a bisa. “Nos a tende preokupashon- i zonidonan krítiko tokante di esaki den media. No ta kuestion ku si e investigashon di poblashon lo bin pa tur hende na Hulanda Karibense, pero mas bien ki dia. Si ta na ami nos ta sigui mas rápido posibel a base di loke ya ta wòrdu hasí na investigashon médiko i ta funshoná na Hulanda Karibense. I nos ta laga institutonan eksperensiá manera ‘Rijksinstituut voor Volksgezondheid en Mileu’ wak bon huntu ku nos.”