Mehorashon supstansial pa abitantenan di Boneiru, Sint Eustatius i Saba

Notisia | 29-06-2018 | 16:35

Ta pa e motibu aki Gabinete Hulandes ta tuma medidanan konkreto pa redusí pobresa i pa mehorá empleo.  E medidanan aki ta forma parti di un pakete mas amplio di inisiativanan pa realisá esfuersonan serio pa oumentá invershonnan na e islanan.  Esaki Sekretarionan di Estado Tamara van Ark di Asuntunan Sosial i di Labor i Raymond Knops di Asuntunan Interior i Relashonnan den Reino a informá Eerste i Tweede Kamer.

Gabinete Hulandes a laga investigá e asina yamá ijkpunt (punto di referensia) pa e siguridat di eksistensia na e islanan.  Partikularmente pa hendenan ku un entrada abou ta difísil pa yega fin di luna ku nan entrada.  E konklushonnan di e investigashon ariba menshoná ta pidi pa akshon. “Dor di subi e entrada di e personanan ku no tin trabou òf ku ya ta ku penshun na Boneiru, Sint Eustatius i Saba nos ke kontribuí na yuda pa nan por hasi nan kompra diario i paga nan hür” Sekretario di Estado Van Ark ta splika, “tambe mi ta haña importante pa hendenan haña oportunidat pa haña un trabou. I ku esunnan ku sali for di ònderstant i haña un trabou por nota un adelanto real di entrada.’

Gabinete Hulandes ta tuma medidanan ku ta kuadra dentro di e konteksto spesífiko di Hulanda Karibense.  “A base di e akuerdo di gobernashon di Gabinete Hulandes kompleto nos ta tuma pasonan importante ku mester mehorá  bida di hopi hende na e 3 islanan” Knops ta enfatisá. “Ku e pakete aki di medida Gabinete ta dal un paso importante dilanti; esaki ta pone tambe ku mandatarionan di e islanan tambe mester hasi èkstra esfuerso.” 

Ku e diferente medidanan Gabinete Hulandes ta sòru pa e gruponan mas vulnerabel manera penshonadonan ku ta nan so, personanan ku ta kompletamente i permanentemente inkapasitá pa traha i mayornan (soltero/a) ku yu por bai dilanti na entrada. Tambe tin medidanan pa baha kosto di bida i pa mehorá e potensial ekonómiko.

Medidanan

Pa subi entrada

• Ònderstant pa personanan ku ta biba independiente ta subi entrante promé di yanüari 2019. 
• Kompensashon pa yu ta subi ku 50 porshento. 
• Gabinete tin komo ophetivo pa introdusí un kompensashon adishonal pa personanan ku ta biba nan so i ta risibí AOV.
• Tambe Gabinete ke subi e suma ku personanan ku ta kompletamente i permanentemente inkapasitá pa traha ta risibí.
• Na e mes momentu entrante 2019 mas hende ta bini na remarke pa haña asistensia partikular dor ku e nivel di entrada ta subi na 120 porshento di e suèldu mínimo stipulá pa lei.
• Riba e asina yamá Prinsjesdag (den luna di sèptèmber) lo wak si por baha e gastunan di dunadó di trabou pa asina suèldu mínimo por subi i ku esaki tambe e kompensashonnan manera ònderstant.  

Pa baha gastunan

• E Gabinete ta duna un impulso na bibienda sosial na e islanan dor di introdukshon di un forma di supsidio di hür.
• Tambe Gabinete ta ofresé un supsidio pa garantisá akseso na suministro di awa di bebe i tambe lo revisá lei i reglanan di telekomunikashon pa redusí gastunan.
• Ademas lo bai hasi esfuersonan pa proyektonan pa produsí fruta i berdura lokal keda realisá.

Pa mehorá akseso na trabou

• Tambe Gabinete Hulandes ta bai yuda pa mehorá kalidat i akseso na krèsh pa yu.
• Gabinete lo bai hasi esfuersonan pa stimulá pa hendenan kuminsá nan propio empresa ku kréditonan mikro i pa sostené Kámara di Komersio. 
• Finalmente ta hopi importante pa hendenan ku pèrdè trabou haña un otro trabou rápido pa asina nan por tin un mihó entrada.  Gabinete ku yudansa di e munisipio Leiden a kuminsá traha riba esaki  kaba, pero mester traha mas duru riba dje.

Gabinete Hulandes a tuma e investigashon realisá hopi serio i ta traha riba un kooperashon konstruktivo ku Entidatnan Públiko pa asina e situashon ekonómiko pa hopi hende por drecha.  Na 2020 lo midi e impakto di e medidanan ku a tuma pa asina disidí si mester bini ku medidanan adishonal.